Sarâng micron 120 aia pan India ramah hman khap a ni

Mizoram Pollution Control Board (MPCB) chuan thuchhuah siamin, sarâng micron 120 aia pante sorkar laipuiin December 31, 2022 aṭangin hman a khap tih a tarlang a, sorkarin a khap chinte chu hmang lo tur leh leia hralh lo turin mipui an ngen.

MPCB chuan, sorkar laipuia Ministry of Environment, Forests & Climate Change-in August 12, 2021-a hriattirna a chhuah angin, hman khat daih sarâng (single use plastic) khap a lo ni tawh tih an tarlang a, "Sarâng ip (carry bag) micron 120 aia pante pawh December 31, 2022 aṭangin khap leh a ni ta bawk," an ti.

Dan bawhchhiate chu Environmental Protection Act, 1986-in a sawi angin an bungrua man sak te, environmental compensation lâk leh an industry khârte thlenga hrem theih a nih thu MPCB chuan an tarlang bawk.