Ban phâkah sorkar a inhúng hnai - Mizoram BJP

BJP, Mizoram Pradesh chuan, coronavirus leng vanga India rama harsatna thleng mek tuam damna tur 'Atmanirbhar Bharat Package' atan cheng vbc. 20,00,000 dah a nih thu Prime Minister-in a puan hnuah, Finance minister Nirmala Sitharaman-i'n May 14 khan mipui ṭanpuina tur dang a puang leh tih an tarlang a; "Modi-a kaihhruai sorkar kan ban phâkah a inhúng hnai a ni," an ti.

BJP Mizoram tarlan danin, Prime Minister leh Finance Minister-te'n mipui chhawmdawlna tur an puan zingah, state danga hna thawk zawng zawngte chu a thlàwnin thla hnih chhungin ei leh in tur (ration) pek/sem tur a ni a, ration card nei lote pawh pek an ni ang. Ration sem tur hi mi pakhat tan thla khatah wheat/rice kg. 5 leh dailuah kg. 1 a ni a, hemi bik atan hian cheng vbc. 3,500 ruahman a ni.

PM-in 'One nation, one ration card' portable ration card kalpui tura a tihah national portability of accounts hman a ni dawn a, state 23 aṭangin mi 67 tan hman theih a ni tawh a, PDS/retailer 83% a huam tawh a, March 2021-ah tuam chhuah vek tum a ni. Hemi ti hlawhtling tur hian state sorkar hman a ni dawn a, mahni state ni loa hna thawka awm (migrant worker) nuai 800-te'n an chhawr ṭangkai thei dawn.