Bawnghnute hralh tam leh tawh

Covid-19 vanga inkhàrkhip thawh thumna kalpui a nih hnuah Mizoram Milk Producers’ Co­operative Union (MULCO) chuan inkharkhip thawh khatna leh thawh hnihna aiin bawnghnute an hralh chhuak tam. Chutih laiin, inkhàrkhip vangin phai lam aṭanga bawng chaw ṭha lak luh a awm lo a, bawng vulhtute’n bawnghnute an thar chhuak tam lo thung.

MULCO manager Lalhmun­liani chuan Vanglaini palai zawhna chhangin, MULCO chu inkhàrkhip thawh thumna aṭangin a hmaa maxicab tlàn theihnaa an thawnna ṭhinah an thawn leh vek tawh tih a sawi. Bawnghnute ­erawh an hmuh ṭhat loh thu sawiin, “Inkharkhip vangin bawng chaw ṭha an nghei nasa a, hnim hnah aṭang ringawt chuan a tak 

ṭhat loh bakah an sáwr tam thei lo. Bawnghnute ni khata kan lak zat pawh a hma aiin litre 1,400 velin a tlem a ni,” a ti.

Inkhàrkhip chu bawng vulhtute’n an tawrh nasat thu sawiin Lalhmunliani chuan, “Bâwng chaw ṭha an hmuh loh vanga a hnute an sâwr tam theih loh bakah, inkhàrkhip nasat zual lai khan bawng damlote enkawl zung zung a harsa a, ngai awh leh tur chuan thla thum/li vel a ngai dawn,” a ti a; bawng kah rai chungchangah pawh inkhàrkhip vangin harsatna tâwk an awm thu a sawi.

MULCO Manager chuan, bawnghnute fûnna (packing) polyfilm pawh inkhàrkhip thlahdul a nih avangin phai aṭangin an chah thlen tawh thu leh chhûn lama dawr hawn theih a nih avangin bawnghnute hralh chung­changah ngai an awh leh thuai a beisei thu a sawi a, “Kan dairy firm lama thawktute tan kut silna kan siam vek a, mask kan pe vek bawk. Páwn lam mi luh kan phal lo a, kan fimkhur hle a ni,” a ti a; bawnghnute buaipuina hmun leh hmanraw hrang hrangte chu disinfectant hmanga phuh thianghlim 

ṭhin a nih thu a sawi bawk.