Bilkhawthlira kuhva chíngtute'n Kuhva ip 310 vel an man tawh
Dan loa kuhva rah phurh chângtu Kuhva Chingtu Cooperative Society, Bilkhawthlir (KCCSB) duty-te chuan January 16, Thawhṭanni zingah leh zanah dan loa kuhva phurh ip 41 an man a, December 14, 2022 aṭanga an duty hnuah kuhva rah ip 310 vel an man tawh.
KCCSB president Thangtama hnen aṭanga thu dawn danin, KCCSB duty-te hian Thawhṭanni zing dar 2 vel khan Vairengte lam aṭanga Kolasib lam pana tlân hnam dang lirthei (truck) sawhthing phur aṭangin Myanmar aṭanga dan loa lak luh nia hriat kuhva ip 25 an man a; Thawhṭanni zan vêk, zanlai pelh hretah hnam dang pick-up aṭangin kuhva rah ip 16 an man leh bawk.
KCCSB duty-te hian January 16, Thawhṭanni zing khawvar hma khan sawhthing phur truck pakhat chu ringhlelin an enfiah a, sawhthingte an hlàn thlak hnuah sawhthing ip hnuai lamah kuhva rah ip 25 an hmu a; kuhva rahte chu Thawhṭanni zing khan hàl nghal a ni.
Kuhva phurtu truck driver Islam Ahmed, Karimganj nia insawi chu a tlanbo a, kuhva neitu Vairengte Zalen Veng lam nia insawi nu pakhat chu KCCSB duty-te kuhva an manna hmunah kalin, kuhva ro chu Vairengtea kudam aṭanga an lei, an hralh chhawn tur a nih thu a sawi.
KCCSB duty-te hian January 16, Thawhṭanni zan zanlai pelh hretah khan Vairengte lam aṭanga tlân pickup truck aṭangin kuhva rah ip 30 an man leh bawk a, nimin tlai khan an hâl ral a ni.
KCCSB duty-te hi December 14, 2022 aṭang khan dan loa kuhva phurh chàngin an khaw dáiah chhun zan zawmin an duty a, an duty ṭan aṭanga nimin thleng khan dan loa ram dang aṭanga lak luh kuhva ip 310 vel an man tawh.
Kuhva rah an chàn ṭan ní, December 14, 2022 khan Bilkhawthlir bula kudam pakhat an dapnaah kuhva rah ip 120 vel manin, an hâl nghal a; January 4, 2023 zing dar 2 vel khan tuialhthei phurtu (tanker) Aizawl lam aṭanga Vairengte lam pana tlân pakhat aṭangin kuhva rah ip 150 an man a, an hâl nghal bawk a ni.
Hetih lai hian, nimin zing khawvar hma, dar 2 vel khan Bilkhawthlir Khàrzáwlah police-te'n Vairengte lam aṭanga Bilkhawthlir/ Kolasib lam pan hnam dang lirthei pakhat aṭangin kuhva rah ro ip 40 an man bawk.