Excise & Narcotics department-in kuminah zu ûm 1,329 man tawh

Excise & Narcotics department (END) chuan kumin 2023-ah January 1-16 chhungin zu khapna dan, MLP Act 2019 tlawhchhanin rakzu litre 3,348, zu bilh lai ṭín 2,984, dawidim kg. 43, sapzu (IMFL) 1,329 an man tawh a, beer bûr 518 leh Myanmar zu (BEDC) litre 81.600 an man tawh bawk.

END thuchhuah chuan, tunlaia Mizoram hmun hrang hranga dan loa zu siamte chu mihring hriselna atan a hlauhawm tih tarlangin, in lo turin mipui an chah a ni.

END leh Assam Rifles mi leh sate chuan January 16, Thawhṭanni tlai dar 3 vel khan Mualkawi, Champhai district-ah heroin gram 264.400 (hawng 21) leh a neitua puh - Lalṭhuampuii (39) d/o Zoliana (w/o Lalremliana) leh Lalbiakthangi (40) d/o Lianchhuma (w/o lalengkima), Ruantlang Mualveng nia insawite an man. Heroin an man hi Rs 1,31,70,000 hû a ni.

January 16 vêk khan END leh Central YMA hnuaia ruihhlo dotu Central Anti Drugs Squad thawk dun pawhin heroin gram 72 leh a neitua puh mi panga an man bawk.

Heroin vanga mante lakah Narcotics Drugs & Psychotropic Substances Act, 1985 tlawhchhanin thubuai ziah luh a ni a, nimin khan court-ah hruai an ni.