Minister-in hna thawh mekte a enfiah

Minister of state Robert Romawia Royte chuan nimin khan a bial, Aizawl East-II chhunga hmasawnna hna thawh hrang hrang tlawhin a enfiah a; mipui mamawhna hriaa chak zawka hna thawk turin thawktute a hrilh.

Robert Romawia Royte hian Aizawl Smart City hnuaia Chite khelmual siam leh phûl lem phah tura hna thawh mek te, Ministry of Tourism aṭanga sum hmuh hmanga Aizawl Convention Centre sak mekte a tlawh a; Convention Centre chu kumin August thla chhunga zawh hman tum a nih thu hna thawktu Wapcos company hotute'n an lo hrilh.

Minister hian 1st MAP Ground-a phûl lem phah hna thawh mek a tlawh a; phûl lem phah zawh tawh niin, gallery leh field hnuai chei hna thawh mek a ni.

Robert Romawia Royte hian Chite lei leh bazar haat siam mek te, UDPA hnuaia cheng nuai 75 hmanga Armed Veng chuanchung leh chuanhnuai inkal pawhna kawng siam mek te, Mizoram State Sports Council enkawla Armed Veng South hall zauh mek te, Dawrpuia basketball court siam mek leh Civil Hospital, Aizawl Trauma Centre sak mekte a tlawh bawk.

Minister hi Sports secretary Dr Lalrozama leh director K Lalrohlua, Tourism drector Saitluanga leh joint secretary V Lalengmawia, Aizawl Smart City chief executive officer Lalrothanga leh officer dangte'n an ṭawiawm a ni.