KHAWTHLIR

Kuhva phurh khap
Kolasib district magistrate John LT Sanga chuan thupek chhuahin, Kolasib district-ah dan loa kuhva phurh luh phal a nih loh thu leh kuhva phurte kaltlangtir phal a nih loh thu a puang. Dan loa lak luh kuhva phurh chu sorkar laipuia Ministry of Home Affairs leh Mizoram sorkara Home department khap a nih thu leh, dan bawhchhiate chu IPC Section 180 hmanga hrem theih an nih thu a tarlang bawk.

BJP-in tawrhpui
BJP, Mizoram Pradesh chuan thuchhuah siamin, January 16, Thawhṭanni zing dar 4 vela Melthum daia lirthei chesuala CADC MDC pahnih leh mi dang pakhat an thi chu pawi an tih thu leh an chhungte an tawrhpui thu an tarlang a, "CADC tan chànna nasa takah kan ngai," an ti. Hliam mi pahnihte chu ṭha chhuak leh thuai se an duh thu an sawi bawk.

CYCA an lâwm
Central Young Chakma Association chuan, January 16, Thawhṭanni zinga Melthum dáia lirthei chesualnaa chhanchhuah hna thawk a, mi pathum thite leh mi dang pahnih hliamte buaipuitu Melthum Branch YMA hruaitu leh member-te chungah an lawm thu an tarlang a, "Tlawmngaihna an lantir hi lawmawm kan ti tak zet a, hun lo kal zel turah pawh inpuih tawn zel ni se kan duh," an ti.

Khuallian nei lo
Indian Reserved Police 2nd Battalion, Khawzawl hotute chuan, January 16, Thawhṭannia 2nd IR din champha vawi 22-na an lawmnaah khuallian an awm loh thu leh, an commandant hmasa ber LT Hrangchal, MPS chu khuallian a nih loh thu Vanglaini palai an hrilh.

Kang thelhna sem
Khawzawl District Disaster Management Authority hmalaknain nimin khan Khawzawl district bawrhsap CC Lalchhuangkima chuan Khawzawl district-a village council 38 hnenah State Disaster Response Fund kaltlanga lei kâng ṭhelhna (fire extinguisher) a sem. Fire extinguisher hi kg. 4-a rit a ni a; semna inkhawmah hian VC, MJA member leh Khawzawl Quick Response Team-te an tel a ni.