RD Minister-in Chalfilh tui lâkna a hawng

Chalfilh tlanga tui lâkna leh tuihna siam tharna tur Springshed Development & Water Supply for Chalfilh Catchment Area tih chu nimin khan Rural Development minister Lalruatkima'n a hawng.

Springshed Development & Water Supply for Chalfilh Catchment Area project hi kum 2017 khan NABARD-ah thehluh niin, kum 2020 khan NABARD-in an pawm a; February 10, 2020-ah hna thawh ṭan niin, October 16, 2021 khan zawh a ni. Rural Development department hnuaiah NABARB (RIDF-XXIV) aṭanga hmuh cheng nuai 528.92 hmangin siam a ni.

Project hi tui lâkna tur bakah, Chalfilh tlang leh a chhehvel ramngaw chereu zel tur venna atan tuihna tihpun lehna tura ruahman a ni a; tui lak hian khaw pathum - Hmunnghâk, Lailak leh Khanpui khuate a châwm dawn.

Tui litre 6,000 dawng zonal tank 10 dah a ni a, tui khâwlna turin tui litre 3,00,000 dawng tuizém lian Khanpuiah pahnih leh Lailak leh Hmunnghakah pakhat ve ve dah a nih bakah, Lailakah tui litre 2,00,000 dawng tuizém pakhat dah a ni.

Minister Lalruatkima chuan, ramin hma a sawn rualin leilung leh boruakin chhiat lam a pan a, tuihna a tlem tial tial tih sawiin, "Kan ramngawte leh tuihnate siam thar leh turin khawvel ram lian leh India sorkar ngei pawhin nasa takin hma a la a ni," a ti.

Thing leh mau tichereu lo zawnga theihtawp chhuah chu tihmâkmawh a nih thu sawiin Lalruatkima chuan, "Sorkarin mipui hnena tui thianghlim pek hi a mawhphurhna a ni. Chumi rualin, tui lâkna hmunhma leh hmanruate sorkarin a vil reng thei lo a, khaw neitu mipuite'n mawh an phur ve a ni," a ti a; Khanpui, Hmunnghak leh Lailak khaw mipuite chu neitu rilru pua department hmalaknate vil turin a chah.

RD Minister chuan, Rural Development department-in scheme hrang hrang kaltlanga thingtlang mipui hmasawnna turin hma a lak thu te, scheme tam takah mipui ṭawiawmna ṭha leh department hotute ṭhahnemngaihna vangin Mizoramin state dangte aiin hma a lak ṭhat thute a sawi bawk.