HIV vei leh vei loh endikna self test chungchang inzirtirna hun hman a ni

Mizoram State AIDS Control Society (MSACS) leh ICMR-NARI, Mizoram University chuan January 16, Thawhṭanni zan khan Christ The King Cathedral hall-ah ṭhalai kum 18-24 inkarte zingah HIV vei leh vei loh endikna self test kalpui a theih dawn leh dawn loh zirchhianna an buatsaih a; Catholic Ṭhalai Cathedral Branch member zinga 97.4%-in HIV self-test an duh.

He hunah hian MZU associate professor Dr Henry Zodinliana Pachuau-in HIV self-test chungchang a sawifiah a; HIV positive Lalruatfeli'n HIV a kài dan leh positive a nih hnua a tawnhriatte a sawi. Ṭhalai kalkhawmte'n zawhna chi hrang hrang an zâwt a, hun hmanpuitute'n zawhnate an hrilhfiah a ni.

Project-in a tum chu, HIV vei tih rang taka hriat chhuah a nih chuan enkawlna an dawng thuai ang a, chu chuan an chhungkua, an hmangaihte leh an bulhnaia mite an kài chhâwng lo thei ang tih a ni. Christ the King Catheral-ah hian Catholic Ṭhalai zinga zirbingnaa tel zinga mi 97.4%-in HIV self-test an pawm a, an dinhmun an hriat theih phah a ni.

Zirbingnaa an tarlan danin, khawvela HIV darh zel sutkian tumna 95:95:95 hmalakna kal mekah HIV self test-in awmzia a neih beisei a ni a; kum 2025-ah chuan HIV veite zinga 95%-in HIV an vei a ni tih leh an dinhmun an hria ang a, HIV vei mek zinga 95%-te'n anti-retroviral therapy (ART) an la ang a, ART la zinga 95%-te'n mi dang kài chhâwng thei tawh lo turin a tlahniam ang, tih a ni.

Tuna Mizoram dinhmun chu 64:85:91 a ni a; a awmzia chu HIV positive 64%-in an vei tih an inhria a, HIV vei zinga 85%-in ART an la a, ART la zinga 91%-te chu mi dang kai chhâwng lo turin an dinhmun a ṭha tihna a ni.

Zirbingna hun hmannaa tarlan danin, kum 2019 data ang chuan, Mizoramah HIV positive ni tinin mi pakua hmuh thar zel ang a ni.