BIS inkaihhruaina zawm dan tur sawiho

State Committee on Standardisation chu nimin khan an chairman Dr Renu Sharma, chief secretary hoin Secretariat conference hall-ah an ṭhukhawm. Chief Secretary chuan, sorkar hnuaia bungrua leh hmanrua lei leh lâk chungchangah a theih chin chinah BIS inkaihhruaina a zawm a ṭul thu a sawi.

Dr Renu Sharma chuan, thil ṭha neihna atana Bureau of Indian Standards (BIS)-in kaihhruaina leh zawm tur a duante chu mipuite'n an hriata an zawm a pawimawh thu a sawi a, "Mizoram sorkar pawhin kan ngaih pawimawh a ngai a, thil ṭha leh rintlak bakah, mipui himna kan ngaihtuah a ṭul. Sorkar hnuaia bungrua leh hmanrua lei leh lak chungchangah a theih chin chinah BIS kaihhruaina kan zawm a ṭul a ni," a ti.

Ṭhutkhawmah hian hmalak dan tur hrang hrang - tui connection neite'n BIS kaihhruaina mil tui thianghlim in tur an dawn ziah theih dan tur te, ISI chhinchhiahna tel lo tui in tur zawrh a nih lohna tura hmalak dan tur te, ISI chhinchhiahna tel helmet chauh hralh a nih theihna tura hmalak dan turte sawiho a ni a; Mizoram sorkar hmalak tawh dante tarlan a ni bawk.

BIS hotute chuan, Mizoram sorkarin kum 2020-a a din tawh Stan-dardisation Cell chu India rama din hmasak ber pawl a nih thu an sawi a; chak lehzuala Cell-in hma a lak theih dan tur te, sorkar, industry hrang hrang leh BIS thlun zawmtu a nih avanga a pawimawh thute an sawi a ni.

BIS CARE mobile application siam a nih thu te, mobile application kaltlangin - rangkachak, helmet, tui in tur (bottle), mobile phone, adt. himna kawngah India standard mil a nih leh nih loh endik theih a nih thu BIS hotute chuan an sawi bawk.