Ráltlân leh dan loa lut, piang leh thite dan anga chhinchhiah theih a ni lo

Champhai District Coordination Committee under Civil Registration System of Births & Deaths chu an chairman James Lalrinchhana, DC kaihhruaiin nimin khan DC conference hall-ah an ṭhukhawm a; ráltlân leh ram dang aṭanga dan loa Mizorama lut, piang leh thite dan anga chhinchhiah (register) theih a nih loh thu an tarlang.

Ṭhutkhawmah hian, certificate siam chawp leh a lemte man chhuak turin ṭan rual a pawimawh thu leh uluk lehzuala ven a ṭul thu an sawi a; ráltlân leh ram dang aṭanga dan loa Mizorama lut, piang leh thite dan anga chhinchhiah theih an nih loh thu tarlan niin, Champhai district-a Registrar of Births & Deaths (RBD) 64-te chu dan hnuaiah finfiahna mumal tak nei a, fimkhur taka piang leh thite chhinchhiah tura chah an ni.

Meeting-a tarlan danin, mahni khua/venga sorkarin RBD a ruatte aṭangin pian ní leh thih ní aṭanga ni 21 chhungin a thlàwnin birth/death certificate lak theih a ni a, ni 21 aṭanga thla khat tlin thlengin Rs 110 chawia lâk theih a ni. Thla khat aṭanga kum khat inkarah chuan district research office-ah Rs 220 chawia dil a ngai a, kum khat a pelh tawh chuan DRO aṭangin non availability certificate (NAC) la hmasain executive magistrate-ah Rs 1,300 chawiin, delayed birth/death certificate dil a ngai tawh a ni.