Excise & Narcotics-in mi 45 hnenah Grape wine zawrh phalna an pe tawh

Mizoram Liquor (Prohibition) Rules, 2022 hnuaiah nimin thleng khan mi 45 hnenah grape wine zawrh phalna (vendore licence) pek a ni tawh. Hetih lai hian, Excise & Narcotics department-in wine an mansakte an la pe lêt lo nia thu dawn a ni.

Vanglaini thu dawn danin, Mizoram Liquor (Prohibition) Rules, 2022 hnuaiah mi eng emaw zatin grape wine zawrh phalna an dil tawh a; nimin thleng khan mi 45 hnenah Excise & Narcotics department chuan grape wine zawrh phalna a pe tawh a ni. Wine zawrh phalna pekte hian department-ah lehkha pawimawh tihfel turte an buaipui mek.

Zu siam phalna (winery licence) chu a diltu nazawng hnenah an pek loh thu thu dawnna chuan a sawi a; Champhai leh Hnahlana winery puitlingte hnenah licence an pek thu te, winery licence diltute chu zu siamna factory an neih dan te, laboratory leh thawktu mithiam an neih dante an endik ṭhin bakah, mihring tana him tâwk factory leh a kaihhnawih hmanrua neite hnenah licence pek a nih thute a sawi bawk.

Mizoram Liquor (Prohibition) Rules, 2022 hman a nih hmaa END-in Champwine an man neitu, vendor licence nei tawh ṭhenkhat chuan END-ah zu an mansakte pek lêt dilna an thehlut tawh a, mahse, nimin thleng khan pek lêt an la ni lo.

END-in zu leh wine chi hrang hrang a man zingah winery-in pangngai taka a siam wine-te ni lo chu pek lêt theih a ni lo nia thu dawn a ni.