RRF notification ṭhiah chungchanga Gauhati HC thutlukna 'stay' a ni

Gauhati High Court Aizawl Bench-in Riverine Reserved Forest (RRF) notification a ṭhiah tawhna chu Gauhati High Court vêk Principal Bench chuan a titawp (stay) a, RRF notification ṭhiahna thupek khinletna chu a ngaihtuah zui zel dawn.

Tarlan tawh angin, Tuirial Hydro Electric Power Project siamna atana tuikhuahin ram a chîm neitu nia insawite'n Gauhati HC-ah writ petition an thehluh avangin Gauhati HC Single Bench chuan January 27, 2021 khan RRF notification chu a ṭhiat a; tuikhuahin a chîm china ram neitute hnena zangnadawmna pek ngai tur pawh Mizoram sorkar pek turin a dah.

Gauhati HC Single Bench thutlukna hi Mizoram sorkar chuan a khing lêt a, mahse, November 9, 2022 khan khinlêtna aṭanga a inhnuhdawh avangin Justice S Serto leh Justice PJ Saikia te ṭhutna Gauhati HC Division Bench chuan thubuai a titawp a ni.

Hetih lai hian, Gauhati HC-in RRF notification a ṭhiahna chu Centre for Environment Protection (CEP) pawhin khin lêt phalna Supreme Court aṭanga a hmuh hnuah an khing lêt ve bawk a; hei erawh hi chu a kal zel a, Gauhati HC Chief Justice telna Division Bench (Principal Bench) ngaihtuah tura dah a ni.

CEP-in Gauhati HC order an khinna chu Gauhati HC chief justice mawhphurhna la mektu Justice N Kotiswar Singh leh Justice Soumitre Saikia te ṭhutna Principal Bench chuan nimin khan a ngaihtuah a; Single Bench-in thutlukna a lo siam tawh chu 'stay' in, HC-in a ngaihtuah zui chhung chuan RRF chu nung zel turin a dah a ni.

CEP hruaitu AC Zonunmawia hnen aṭanga thu dawn danin, Gauhati HC Single Bench-in January 27, 2021-a RRF notification a ṭhiah hnuah khinletna Gauhati HC Aizawl Bench-ah an thehlut a; Aizawl Bench chuan Division Bench (Principal Bench) ngaihtuah turin nikum khan a thawn a, case no. chu WA/274/2022 a ni.