Lawngtlai Bawrhsapin ramri a tlawh

Lawngtlai DC Shashanka Ala chuan May 13-14 chhung khan Lawngtlai district chhim lama khaw hrang hrang a tlawh a; Covid-19 donaa hmalak dante a enfiah bakah, Indo-Bangla border ramri leh Indo-Myanmar ramri a tlawh.

Shashanka Ala hian Ningani khan Nghalimlui, Longpui­ghat, Devasora North, Fulsora, Chhotaguisury-I, Damdep-I, Damdep-II, Damdep-III, Fultuli (Chhippui), Devasora South, Bandukbanga, Gobasury, Siminasora, Parva-I, Parva-II, Parva-III leh Parva-IV te a tlawh a; nimin khan Kâwnkhua, Tuisentlang, Ngunling (Bedsury), Tuichawngtlang, Vathuampui, Chikhurlui leh Saibawhte a tlawh bawk. Khaw hrang hrangah hian task force-te nen an inkâwm a ni.

Lawngtlai Bawrhsap hian task force-te chu pawisa, silpauline leh hmui tuamna a pe hlawm a; khaw hrang hrangin an harsatna an sawite chu a theih anga chinfel dan a ngaihtuah tur thu a sawi.

Lawngtlai district chhim tàwp, Siminasora khaw bula Réng tlangah India, Bangladesh leh Myanmar ram pathumte inrìna (tri-junction border) a awm a; chumi bul velah chuan ramri vengin Assam Rifles (Myanmar ramri vengtu)-te leh Border Security Force (Bangladesh ramri vengtu)-te an awm. Sipai hotute chuan, ramri uluk takin an véng a, lut leh chhuak an awm loh thu Bawrhsap chu an lo hrilh a ni.