Covid-19 vei hmuh chhuah tam ber ní August 1-ah mi 55 hmuh chhuah a ni

Inrinni khan Zoram Medical College (ZMC) laboratory-ah mi 194 (mipa 177 leh hmeichhia 17)-te swab sample endik a ni a, Covid-19 lakah mi 140 an fihlim laiin, hripui vei mi 54 hmuh chhuah belh a ni a; Lunglei Civil Hospital (LCH) laboratory-a mi 28-te sample endikah hripui vei mi pakhat hmuh chhuah a ni bawk. Sorkar thuchhuah tarlan danin, ZMC laboratory-a swab sample endik 194 zingah sample 133 a negative a, negative zingah Covid-19 vei endik nawn mi 15 an tel a, chutih laiin, endik nawn zinga mi pasarih chuan hripui an la vei thung.

ZMC-a hripui vei hmuh tharte chu Aizawl district-a mi vek, mipa 53 leh hmeichhia pakhat, kum 23-55 inkar an ni. Mi 46 chu sipai - BSF, Assam Rifles leh CRPF mite an ni a, an zinga mi 44 chu sipai hmuna khung hran mek an nih laiin, pahnih chu harsatna an neih vanga State Referral Hospital (SRH)-a dah luh tawh sa an ni. ZMC-a Covid-19 vei hmuh chhuah dang pariat chu civil mi niin, mipa pasarih leh hmeichhia pakhat an ni a, an zinga paruk chu Mizoram páwn aṭanga haw, quarantine facility-a awm mek an nih laiin, mipa pahnih chu Aizawla hotel pakhata thawk, mi dang aṭanga kai ve ve an ni.

LCH laboratory-a TrueNAT hmanga Inrinnia Covid-19 vei hmuh chhuah chu BSF sipai kum 58 mi, Bihar aṭanga tun hnaia lo lut a ni a, symptom a lang lo a, Vanhne-a BSF quarantine centre-a awm lai a ni. LCH laboratory-ah hian Inrinni thleng khan swab sample 1,052 an endik tawh. Hetih lai hian, August 1 khan Covid-19 vei dam tawh mi paruk chhuahtir an ni a, nimin khan mi panga chhuahtir leh an ni bawk.

Inrinni khan Covid Care Centre (CCC) - AYUSH Hospital, Thenzawl aṭangin chawhma dar 10:30-ah mipa naupang kum 12 mi, Aizawl district-a mi chhuahtir a ni a; AYUSH Hospital aṭang vek hian chawhnu dar 2:30-ah Zokhawsanga Assam Rifles pakhat leh Dur­tlanga awm BSF sipai pakhat chhuahtir leh an ni. Inrinni vek chawhnu dar 2 khan Dedicated Covid Health Centre (DCHC), Siaha a­ṭang­in Covid-19 vei dam tawh pathum - mipa pahnih leh hmeichhia chhuahtir an ni a; Siaha district-a hripui vei mi 26 an chhuak vek tawh a, Covid-19 vei an awm tawh lo. Nimin khan Lunglei CCC aṭangin BSF mi pahnih, Serchhip DCHC aṭangin mi pakhat leh Berawtlang CCC aṭangin BSF pahnih chhuahtir a ni.

July 31, Zirtawpni khan ZMC laboratory-ah mi 134 (mipa 83 leh hmeichhia 51)-te swab sample endikah Covid-19 vei mi pathum hmuh chhuah a ni a, LCH laboratory-a sample 36 endik aṭang leh Serchhipa Rapid Antigen Test hmanga endik aṭangin mi pakhat ve ve hmuh chhuah a ni bawk. ZMC-a kar hmasa Zirtawpnia sample 134 endik zingah sample 128 a negative a, negative zingah Covid-19 vei endik nawn mi paruk an tel. Hripui vei hmuh chhuah pathumte chu Aizawl district-a mi vek, mipa pahnih leh hmeichhia pakhat, kum 24-56 inkar, civil mi pahnih leh BSF sipai pakhat an ni a, Manipur, Assam leh Tripura aṭanga rawn lutte an ni. BSF sipai pakhat hi harsatna a neih vanga SRH-a dah luh sa a ni a; civil mi pa­hnihte erawh chu quarantine-a awm lai, symptom lang lo an ni thung.

July 31-a LCH laboratory-a hripui vei hmuh chhuah chu tun hnaia Assam aṭanga lo haw hmeichhia kum 16 mi a ni a, quarantine facility-a awm lai niin, Covid-19 symptom a lang lo. Rapid Antigen Test hmanga Ser­chhipa Covid-19 vei hmuh chhuah chu mipa kum 27 mi, Jammu & Kashmir aṭanga haw, quarantine facility-a awm lai a ni a, Covid-19 symptom nei a ni. Mizorama Covid-19 vei hmuh tawh zawng zawng chu mi 468 an ni a, civil mi 238 (50.85%) leh sipai mi leh sa 230 (49.14%) an ni a, mipa 361 leh hmei­chhia 107 an ni.

Covid-19 vei tawh mi 468 zinga mi 258 (55.13%) chu chhuahtir an ni tawh a, vei mek leh la chhuahtir loh mi 210 (44.87%) an awm. Hripui vei zinga endik nawnnaa vei tawh lo tih finfiah tawh, la chhuahtir si loh eng emaw zat an awm a, a zat chiah erawh hriat theih a ni lo. Chhuahtir tawh mi 258 zinga 189 chu civil mi an ni a, mi 71 chu sipai mi leh sa an ni. Enkawl mek mi 210 zinga a tam zawk chu sipai an ni a, civil mi 49 an tel.