ZPM MLA-te fund hman dan avangin ZPM thláwptu an pung - Vanlalhlana

ZPM Legislature Party (ZLP) deputy leader Vanlalhlana chuan, ZPM MLA-te'n LADS fund an hman dan avangin ZPM thláwptu an pung zel niin a sawi. He thu hi Vanlalhlana hian August 1, Inrinnia a bial Durtlang khuaa Suaka Venga ZPM unit dinnaah a sawi a ni.

Vanlalhlana chuan, MLA-te'n kum khat leh a chanve chhunga an development fund an hman dan a lan tawh thu sawiin, "Mi tam takin ngaihdan thar an nei a, ZPM puih duh an pung mek. Suaka Venga ZPM unit din a ni hi MLA fund hmanga hmasawnna hnathawh vanga mipuite'n lawmthu an sawinaah ka ngai," a ti.

Thusawitu dang K Sapdanga, ZPM secretary general chuan, state sorkarin a hnathawkte hlawh a pûk pawh a pe thei lo chunga hmasawnna project man tam pui pui thawh tum ni âwm taka lungphùm an phúm ṭhin chu lemchanna a nih a hlauhthawnawm thu a sawi a; veng hmasawnna atana ṭhahnem ngaite chu AMC leh LC/VC inthlanah rilru fím tak pu turin a chah. ZPM thuchhuah tarlan danin, Durtlang Suaka Vengah hian chhungkaw 19-a voter 61-in ZPM an zawm a, unit an din nghal a ni.

Inrinni vêk khan ZPM chuan Sumsuih khuaaah mi thar an lawm lut a, mi thar lawm luttu ZPM vice president Lalthansanga chuan, "Kan party zawm tura campaign pawh a awm loh laia hmun hrang hrang ZPM zawmtu an awm hi mipui rilru sûkthlêk puan chhuahna niin ka hria. Kum 2023-ah chuan ZPM sorkar mipuiin an din ka beisei," a ti. ZPM thuchhuah tarlan danin, Inrinni vêk khan Vaitin khuaah ZPM zawmtu mi 65-in ZPM unit leh ṭhalai unit an din a ni.