Horticulture dept.-in loneitute hnenah mau/raw ṭiak 8,49,425 an sem tawh; Raw ṭiak lei nan cheng vbc. 6.48 hman a ni

Horticulture department chuan kum 2020 aṭangin loneitute hnenah mau/raw ṭiak 8,49,425 an sem tawh a, a ṭiak leina atan cheng vbc. 6.48 an sêng tawh.

RTI Act hmanga zawhna Horticulture department-in an chhàn danin, loneitute hnenah mau/raw ṭiak chi thum phuntir a ni a, chungte chu - Dendrocalamus Brandisii, Dendrocalamus Sikkimensis (raw-mi) leh Dendrocalamus Longispathus (rawnâl)-te a ni.

Raw ṭiakte chu kum 2020 aṭangin loneitute chìn turin pek chhuah ṭan a ni a; kum 2020-ah ṭiak 84,000, kum 2021-ah ṭiak 2,50,425 leh kum 2022-ah ṭiak 5,15,000 sem a ni.

Raw chite chu Mizoram chhunga nursery-te aṭanga lei a ni a; mau ṭiak leinate chu - Mizoram Bamboo Producer (MBP), Bairabi Bamboo Nursery (BBN), Rokunga Kawlremi and Sons (RKS) leh Inter-State Marketing Cooperational Services (IMCS)-te a ni.

Raw ṭiakte chu a chi azirin leina man a inang lo a, Brandisii ṭiak pakhat Rs 80-a lei niin, ṭiak 3,44,875 lei nan Rs 2,75,90,000 sên a ni. Longispathus chu pakhat Rs 75 man niin, ṭiak 96,250 lei nan Rs 72,18,750 sorkarin a séng.

Sikkimensis chu pakhat Rs 70 man a ni a, ṭiak 1,22,900 lei nan Rs 86,03,000 an hmang. Sikkimensis vêk pakhat Rs 75-a lei a awm bawk a, ṭiak 2,85,400 leina atan Rs 2,14,05,000 sèn a ni.

Rua an chìntir aṭanga thar chhuah (production) a awm tawh leh tawh loh zawhna chu Horticulture department chuan, "Mau hi chìntir mek lai a nih avangin production a la awm lo. Kum 4-5 hnuah production a awm theih beisei a ni," tiin an chhâng.