CM-in Assam Rifles-te Zokhawsanga insawn tura a duh thu AR hotu sawipui

Chief minister Zoram­thanga leh Assam Rifles 23 Sector commander Brig. Girish Upadhya te chu nimin khan CM banglaah an inkâwm a; Aizawl khawpui laili aṭanga Zokhawsanga Assam Rifles-te insawnna tur chungchang an sawi dûn. Assam Rifles hmun chhuahsan turah Lal­denga Centre leh project dangte siam a nih dawn thu sawi lan a ni.

CM Zoramthanga chuan, Aizawl khawpui lailia Assam Rifles-te chu Zokhawsangah a hma thei ang bera insawn tura a duh thu sawiin, chumi tur chuan AR hotute'n hma la se a duh thu Brig. Girish Upadhya a hrilh a; Assam Rifles nen thawhhona ṭha an neih zel a beisei thu a sawi bawk.

Assam Rifles DIG thar Brig. Girish Upadhya chuan, Mizorama awm thar a nih angin Mizo mipui nen inlaichìnna ṭha tak neih a duh thu a sawi.

Brig. Girish Upadhya chuan, AR-te chu Home Ministry thu angin insawn tur an nih thu te, a rang thei ang bera an insawn theih nan leh tuna Aizawl khawpui lailia an hmun chhuahsan turah Laldenga Centre leh project dang teah a hma thei ang bera hmalak a nih theih nan theihtawp a chhuah tur thu te, an hotute bulah theihtawpa a nawr tur thute a sawi bawk.