CYMA-in Bangladesh ráltlânte an tlawh; Harsatna siamsak lo turin BSF an ngen

19th January, 2023

Central YMA hruaitute chuan nimin khan sahimna zawnga Bangladesh aṭanga Zo hnahthlak Mizorama lutte chu an chenna - Parva leh Vaṭhuampuiah an tlawh a; Mizoramah thlamuang taka awm turin ráltlânte an chah bakah, ráltlân tan harsatna siam lo turin BSF an ngen.

Bangladesh ráltlânte tlawhnaah hian CYMA president R Lalngheta leh assistant secretary Prof. Malsawmliana bakah, CEC member pariat an kal a; YMA sub-headquarters Lunglei hruaitu ṭhenkhat an kal bawk. YMA Tuichawng Group leh Vaṭhuampui leh Parva branch hruaitute leh khawtlang hruaitute'n an lo dawngsawng a ni.

Parva khuaa vantlang inkhawmah CYMA president R Lalngheta chuan, sahimna zawnga Mizorama lutte chu thlamuang taka awm turin a chah a; YMA, sorkar leh Mizo mipuite'n an tih theih chinah theihtawpa ṭanpui an inhuam thu a sawi.

CYMA hruaitute hian Parvaah hian Border Security Force (BSF) hotute an kâwm nghal a; ráltlânte dinhmun leh an harsatnate sawipuiin, manganga sahimna zawnga Mizoram (India ram) rawn pante tan harsatna siam lo a, ṭanpui zawk turin an ngen a ni.

Central YMA hruaitute hian Rs 2,00,000 bakah, mipui thawh khawm ṭanpuina chi hrang hrang (mutbu, tarpauline, emergency light, solar light, charger, adt.) an hlân. Parvaa awmte tan Rs 45,000, Vaṭhuampuia awmte tan Rs 30,000, Chamdûr-P khuaa awmte tan Rs 40,000, Mautlanga awmte tan Rs 30,000 leh Hmáwngbu khuaa awmte tan Rs 30,000 an pe a; YMA, Tuichawng Group hnenah Rs 20,000 leh pastor Sawmkhup ràl nan a fanu hnenah Rs 5,000 an pe bawk.

YMA hruaitute chuan, ráltlânte dinhmun leh an mamawhte an zir chiang a, an mamawh ang zelin ṭanpuina pek zel an tum tih an hrilh a ni.

CYMA hruaitute hi January 17, Thawhlehni zan khan Chawngteah an riak a, YMA, Chawngte Group leh branch hrang hrang hruaitute nen an inkâwm.

Central YMA hruaitute hi Central Young Chakma Association hruaitute nen an inkâwm bawk a; CYMA President chuan, Bangladesh aṭanga ráltlânte puih kawngah theihtawpa ṭang ve tur leh an tana harsatna siam lo turin CYLA hruaitute a ngen a ni.