KHAWTHLIR

2022-ah Lunglei dist. hmun 272-a kâng
Lunglei District Committee on Fire Prevention chu nimin khan an chairman Kulothungan A, district bawrhsap kaihhruaiin DC conference hall-ah an ṭhukhawm a, sorkar hotute leh pawl hruaitute an tel. February 6-10, 2023 chhunga Fire Prevention Week hman dan tur an rél a, Lunglei Convention Centre-ah hawnna inkhawm buatsaih an rél. Forest Survey of India tarlan danin, kum 2022 chhungin Lunglei district-a hmun 272-ah ram a kâng a, chu'ng zinga 227 chu lo hâl vang a ni.

Kawng khâr dawn
Ramhlun Industry Péng (main road) leh Industry Péng (college road) inkar kawng chu vawiin aṭangin PWD-in an siam dawn a, hei vang hian kawng khâr a ni dawn. Hnathawh tibuai theia lirthei leh bungrua dah phal a ni lo.

Minister-in enfiah
Minister Lalchhandama Ralte chuan nimin khan a bial chhunga Darlawn khuain Kohhran Hmeichhe Inkhawmpui Lian an thlen tura inbuatsaihna chi khat, khaw chhung kawngpui chei ṭhat dan tur a enfiah a, Darlawn Vengpui VC Inah Organising Committee hruaitute nen an inkâwm. Minister hi pandal sak mekah a hnatlang ve nghal a ni.

G20 Meeting neih tur thlirho a ni
Mizoramin G20 Meeting a thlèn tur bawhzuitu Sub-Committee on Conference, Programme & Event Management chu nimin khan an chairman Esther Lal Ruatkimi, Commerce & Industries secretary hoin a pisaah an ṭhukhawm a; March 2, 2023-a Aizawla G20 Business Meeting neih tura ruahmanna duante an sawiho. Ṭhutkhawmah hian hun hman dan tur duan lailâwk te, ruahmanna hrang hrang siam tawhte leh sum mamawhte sawiho a ni.

MCDC thukhawm
Mizoram Cooperative Development Council chu nimin khan an chairman C Lalrinsanga, Cooperation minister kaihhruaiin Chief Secretary conference hall-ah an ṭhukhawm a; Mizoram budget-ah provision an neihna tura hmalak rawtna an pawm. Ṭhutkhawmah hian MLA pahnih Dr ZR Thiamsanga leh Dr Vanlalthlana te pawh an tel a ni.