Mizoramah bank hmalakna tur a la tam - Governor

Governor Hari Babu Kambhampati leh Reserved Bank of India (RBI) leh Mizoram Rural Bank (MRB) hotute chu nimin khan Raj Bhavan an inkâwm. Larsap chuan, Mizoramah bank hmalakna tur a la tam thu sawiin, theihtawp chhuah turin a lo fuih.

Dr Hari Babu Kambhampati chuan, Mizoramah bank hmalakna tur a la tam thu sawiin, "Mipui náwlpuiin welfare scheme, social security scheme, loan pûk theih chungchang leh an bank account kaihhnawih banking service an dawn theih tur chungchang chiang zawka hriat an la mamawh," a ti a; bank hnathawkte chu theihtawp chhuaha ṭan la zel turin a fuih a ni.

Aizawl khawpuiah loan tênau mamawhtu tam tak an awm mek thu sawiin Governor chuan, Financial Literacy Week-ah hawker, chawhmeh zuar leh a dangte zingah Mudra Loan leh ṭhalai vengva deuhte leh college zirlaite hnenah stock market leh a kaihhnawih thilte zirtir ni se ṭha a tih thu a sawi.

Bank hotute chuan, February 13-17, 2023 chhunga Financial Literacy Week hman tur chu hawng turin Governor an sáwm a; Financial Literacy Week-ah hian bank kaihhnawih thil leh sum enkawlna chungchang zirtirna ngawrh taka neih tum a nih thu te, uluk zawkin zirlai, loneitu, self help group leh sumdawng tênau zawkte zirtir tum a nih thu Governor an hrilh.

Bank hotute sawi danin, financial inclusiveness leh education tih thupui hnuaiah kawng hrang hranga bank-a sum vawn dan leh thil dangte zirtir te, sum peipun dan leh sum khâwl dan awmze nei zawk mipui hriattir te, sum leh bank account kaihhnawiha inbumna chi hrang hrang laka mipui him dan turte zau zawka zirtir an tum a ni.

Inkawmnaah hian RBI Office, Aizawl officer-in-charge P Shimrah, MRB chairman V Jayachandra leh RBI hotu dangte an tel.