Chief Minister-in hmalakna a enfiah

Chief minister Zoramthanga chuan nimin zing khan a bial, Aizawl East-I chhunga Ṭhuampui leh Zemabawk North-ah hmasawnna ruhrel dinna tur rawtna leh hmalak mekte a tlawh a; hmasawnna hnathawh tur hmabak tam tak a la awm thu a sawi.

Zoramthanga chuan, hmasawnna hnathawh tur hmabak a la tam thu sawiin, "Tun hun atan chauh ni lo, rei tak daih hmasawnna ruhrel ngêlnghet tak siam a pawimawh a, chutiang rilru pua project-te pawh siam a pawimawh a ni," a ti.

Chief Minister hi PWD hotute leh khawtlang hruaitute'n an ṭawiawm a; Zemabawk Bethel leh Middle School Veng inpawhna kawng zauh hna thawh mek te, Ṭhuampui Venga inkalpawhna kawng siam rawtna hmunah kawng laih theih dan tur an enfiah a ni.