National Girl Child Day hman ṭan a ni

Social Welfare minister Lalrinawma chuan nimin khan a pisaah National Girl Child Day lawmna a hawng. Minister chuan, nute'n an fate hnenah hmeichhiate zah tur leh en hrang lo tura an zirtir a ṭul thu a sawi.

Lalrinawma chuan, hmeichhe naupangte himna leh an dikna chanvo humhalh a ṭulzia inzirtirna atana chawlhkar khat chhung hun hman a nih dawn thu a sawi a, "Hmeichhe naupangte pual ni pawimawhah hian an tana khawvel chhenfâkawm, rálmuang, thlamuang leh him siam a ṭul. Nute'n fate thu ṭha kan hrilh a pawimawh a, mipa pawh, hmeichhia pawh, pai a, hring a, chawi liantu chu nute an ni," a ti.

Fate'n enkawltu nute thu an ngaichâng ṭhin tih sawiin Minister chuan, "Hmeichhe naupangte tana khawvel ṭha siam tur chuan a bul ṭanna leh a hlawhtlinna thui tak hmeichhiateah a innghat," a ti a; nute'n an fate hnenah hmeichhiate zah tur leh en hrang lo tura an zirtir a ngaih thu a sawi.

Hawnna inkhawmah hian National Girl Child Day pualin kal khawmte'n hmeichhe naupangte'n him leh thlamuang taka nun an hman theihna turin, anmahni veng him tlat chunga theihtawp chhuah turin thutiam (pledge) an sawi rual a; signature campaign neih a ni bawk.

National Girl Child Day pual hian Social Welfare Minister hian Secretariat building bulah Moringa thing ṭiak a phun a ni.

National Girl Child Day hi January 18-24, 2023 chhung hman tur a ni a, thil chi hrang hrang huaihawt a ni dawn. Hmeichhe naupang hlutna lam pholang thei painting competition, hmeichhe naupangte infiamna uar tura infuihna, Beti Bachao Beti Padhao lam hawi thuziak sorkar leh mimal ina târ, hmeichhia hlutna lam hawi poster leh slogan inziah/insiam siak, hmeichhiate tana thiamthil pawimawhna zirhote buatsaiha kalpui a ni dawn a; kohhran leh khawtlang hruaitute nen kum tling loa inneih ṭhat lohna zirho, hmeichhe fa tihtlak vênna dan leh hmeichhe humhalhna dan chungchang sawihonate buatsaih a ni bawk ang.