Transport Minister-in lawng hmanga Insumdawn tawn theih dan tur a enfiah

Transport minister TJ Lalnuntluanga chuan January 17, Thawhlehni khan Mizoram leh Manipur inrìna Tuiruang leh Tuivai infinna bula Tuivai lui chu lawng hmanga Mizoram leh Assam insumdawn tawnna atan hman theih a nih dawn leh dawn loh a hmunah a enfiah. Nimin khan Zokhawthiang/Kani khaw rama Tuiruang lui kam a enfiah bawk.

Mizoram leh Manipur inrinna, Manipur lama Sihpuikawn khawtlangin an lo hmuahnaah TJ Lalnuntluanga chuan, Zo hnahthlak hnam hrang hrangte khawvel ramri ṭhen dan avangin ram hran leh state hranah awm mah se, thinlunga inpumkhatnain a suih khawm mek tih a sawi a, "Inkalpawh tawnna ṭha neih hi hnam inpumkhat nan a pawimawh tak meuh a ni," a ti.

Transport Minister hian nimin khan Zokhawthiang leh Kani ram bula Tuiruang lui, a hmunhma a kamte a tlawh a; lawng hmanga Mizoram leh Silchar, Assam inkalpawhna atana hman ṭangkai theih a nih dawn leh dawn loh a a enfiah a ni.

Tuivai leh Tuiruang lui chu lawng hmanga Mizoram leh Assam inkalpawhna leh bungraw inthawn tawnna atan ṭangkai taka hman theih a beisei thu sawiin Minister chuan, "Mizoram hmar lam khua, he lui dung chhehvel khua leh mipui tan ṭangkai leh pawimawh tak a ni," a ti.