District tinah National Girl Child Day hmang
Nimin khan Champhai, Kolasib, Serchhip, Lawngtlai leh Mamit district-ahte National Girl Child Day hman a ni.
National Girl Child Day pualin January 18-24, 2023 chhungin Mizorama district tinah kawng hrang hrangin hun hman a ni dawn a; hmeichhe naupang humhimna leh an dikna leh chanvo zirtirna buatsaih a ni ang.
Champhaiah chuan DC Conference Hall-ah bawrhsap James Lalrinchhana'n National Girl Child Day a hawng a; Girl Child Day pual hian vawiin hian vantlang hmun langsar laiah Beti Bachao Beti Padhao (BBBP) sticker târ a ni dawn.
Kolasib-ah chuan bawrhsap John LT Sanga'n a hawng a, kalkhawmte'n hmeichhe naupiang en hrang lo tur leh hmeichhe dinhmun chawikânnaa mi ṭangkai ni turin thutiam an sawi. Girl Child Day pualin thing phun inzirtirna, BBBP sticker târ, high school naupangte tan poster insiamsiak, zirlai hmeichhe naupang zingah infiamna ṭangkaina inzirtirnate buatsaih a ni ang.
Serchhipah chuan MJA Press Club-ah District Hub for Empowerment of Women, District Programme Office buatsaihin National Girl Child Day hman a ni a; hmeichhe naupang humhim tura thutiam an chham bakah, signature campaign neih a ni.
Lawngtlaiah chuan bawrhsap Amol Srivastava hoin Girl Child Day hawnna hun hman a ni. District programme assistant Z Laldinhuala kaihhruaiin thutiam leh press release chhiar rual a ni a, an intiamna nemngheh nan white board-ah hming an ziak. Lawngtlai District VC Association, DCPU leh OSC-te chuan vawiin hian special gram babha koin, hmeichhiate himna chungchang leh thiamna hrang hranga hmeichhiate châwikan chungchang an zirho ang.
Mamitah chuan DC Conference Hall-ah bawrhsap Lalnunhlua hoin National Girl Child Day hapta hawn a ni a; DC chuan, hmeichhe naupang an nih vanga zirna, infiamna leh thil danga thliar hranna nei loa theihtawpa ṭan lakpuitu ni ṭheuh turin kalkhawmte a chah. District Hospital chief medical officer Dr Zothankhuma Chhakchhuak kaihhruaiin hmeichhe humhalhna thutiam chham a ni a, signature campaign neih a ni bawk.