MLA dâwihzep rual awm khawm vangin Lungleiin hma a sawn thei lo - Lalsawta

Mizoram Pradesh Congress Committee (MPCC) president Lalsawta chuan, MLA dâwihzep rual awm khawm vangin Lungleiin hma a sawn thei lo niin a sawi a; Congress sorkar laia Lunglei by-pass road siamna tur sum dah a ni chungin tun thlengin hmalak a la nih loh thu a sawi bawk.

Lalsawta hian nimin khan Lunglei District Congress Committee (LDCC) hruaitute leh party mite nen LDCC President pisaa an inkawm­naah thu a sawi a; Lunglei district aṭanga thlan tlin MNF MLA-te chu dâwihzep tak vek an nih thu sawiin, "MLA dawihzep rual awm khawm vangin Lungleiin hma a sawn thei lo. MLA huaisen pakhat tal chu nei se, hetiang mai mai hian Lunglei khawpui hi a awm tawh lo ang a, hmasawnna hmél thar a hmu tur a ni," a ti.

MPCC President chuan, "An dawihzep avangin Covid len lai pawhin Pu Zodintluanga, Thorang bialtu MLA leh Congress Legislature Party leader-in RT-PCR khawl chhim mipui tana a pek pawh an dah mai mai tawh a ni," a ti a; Lunglei district-a MNF MLA-te chu thil ṭhaah pawh an huaisen ngam lo tih a sawi.

Lunglei by-pass road siam thuai a ṭul thu sawiin Lalsawta chuan, "Pu Hawla hoin kan ngaihtuah em em a, Lunglei tan a pawimawh tih kan hria. Kan sorkar laiin bul ṭanna tur sum kan dah a, vawiin thlenga hmalakna hmuh tur a la awm lo hi a lungchhiatthlak hle. Lunglei by-pass road a hlawhtlin kan duh tak zet a ni," a ti.

Congress party President chuan, Lunglei khawpuiah traffic police indaih lohna vanga mipui leh lirthei neitute'n harsatna an tawh ṭhin chu ngaih pawimawhawm a tih thu a sawi a, "Lunglei khawpui ṭhang zel leh mihring kea kalte'n harsatna, vanduaina, chetsualna an tawh lohna turin traffic police tihlen a ngai a ni," a ti.

Lalsawta chuan, Lunglei khawpuiin water supply scheme dang a mamawh tak zet tawh thu leh Congress party-in an ngaih pawimawh thu sawiin, "Kan sorkar a nih chuan Lunglei by-pass road leh Lunglei water supply scheme phase-II hi kan hmalak hmasakna turte zing a mi a ni," a ti bawk.