Central-in a thlawna buhfai a sem vangin, state sorkarin a tum ve titawp

Food, Civil Supplies & Consumer Affairs (FCSCA) secretary Ram­dinliani chuan kumin 2023 chhunga sorkar laipuiin buhfai a thlàwna a sem tur chungchangah hriattirna a tichhuak a; a thlâwnin buhfai sem a nih dawn avangin priority house hold (PHH) chhungkuate tana Mizoram sorkarin buhfai kg. 3-a Rs 45 a belh ṭhin chu tihtawp a nih dawn thu a tarlang.

FCSCA Secretary tarlan danin, Covid-19 lèn hmaa PHH chhungkuate buhfai quota pangngai, mi pakhata buhfai kg. 5 pek bakah, state sorkarin kg. 3-a Rs 45 (kg. 1-ah Rs 15 zel) a belh ṭhin chu a thlâwna buhfai an dawn tawh dawn avangin tihtàwp rih a ni dawn a; a ṭul anga ennawn leh theih a ni thung.

Supply Secretary chuan, sorkar laipuiin National Food Security Act (NFSA), 2013 hnuaia hamṭhatna dawng PHH leh AAY ration card neite tan January 1, 2023 aṭangin a thlâwnin buhfai a sem ṭan tih a tarlang a, "NFSA Section 3-in chanvo a pek angin, thla khatah PHH (card pawl) neite'n mi pakhat tan buhfai kg. 5 leh AAY (card eng) neite'n card/chhungkaw khatah buhfai kg. 35 an dawng thei a ni," a ti.

Covid-19 hripui lèn vanga sorkar laipuiin PMGKAY hnuaia AAY leh PHH chhungkuate tana an quota pangngai bakah mi pakhat zelah a thlawna buhfai kg. 5 a pek ṭhin chu hripui léng a ziaawm tawh avangin tihtawp a nih thu tarlangin FCSC Secretary chuan a tarlang.

Buhfai a thlàwna sem chungchangah harsatna emaw, hriat chian duh emaw nei chuan office hun chhungin FCSCA Director hnenah zawhfiah theih a ni.