Naupang kum 6-14 inkar sikul kai zat Ram pum aiin Mizoramah a sang

India ram puma sikul hrang hrang zirchianna Annual Status of Education Report (ASER) 2022-a tarlan danin, naupang kum 6-14 inkarah India ram puma sikul kai zat dinhmun (percentage) aiin Mizoram dinhmun a sang zawk.

ASER 2022-ah hian India rama district 616 leh thingtlang khaw 19,060-ah zirchianna kalpui a ni a, in 3,74,544-ah lutin, kum 3-16 inkar naupang 6,99,597-te zir chian a ni. Mizoram bikah chuan zirchianna titute district pariata khaw 228-ah kalin, in 4,859-ah naupangte dinhmun an zir chiang a, naupang kum 3 aṭanga kum 16 inkarte dinhmun an zir chiang a ni.

ASER 2022-in a tarlan danin, kum 2022-a Mizorama naupang kum 6-14 inkar zinga sikul lut zat chu 99.3% a ni a, hei hi India ram pum dinhmun aiin a sang zawk. Chutih rualin, ASER hmasa 2018 report aiin a tlahniam hret a, kum 2018-ah chuan 99.6% a tling.

Mizoramah kum 2006 aṭanga 2014 inkarah kum 6-14 inkarte bikah sorkar sikula zirlai zat a tlahniam hret hret a, kum 2014-ah 59.3% a ni. Chutih rualin, kum 2018 report-ah pung lehin, 72.4% a ni a, mahse, kum 2022 report-ah chuan a tlahniam leh a, 64.7% a ni.

Hmeichhe naupang kum 11-14 inkar sikul kai lo Mizoramah ASER 2018-ah chuan 0.2% a ni a, report hnuhnung ber ASER 2022-ah a pung a, 0.7% a tling. Hmeichhe naupang kum 15-16 inkar bikah sikula inziak lut lo ASER 2018-ah 3.7% a ni a, ASER 2022-ah chuan 5.3%-ah a kai chho.

Mizoramah naupang kum 3 zinga 93.3% chu anganwadi centre-ah an inziak lut tih ASER 2022-ah tarlan a ni a, hei hi India ram pum dinhmun aiin a sang zawk.

India hmarchhak state zingah Mizoram chu pawl 1-8 zirlai (mimal sikul leh sorkar sikul) sum sénga mimala tuition la tlemna ber a ni a, ASER 2022-ah pawl 1-8 zirlai zinga 9.2% chiahin private tuition an kal. Mizoram bikah kum 2014-a report aiin kum 2022-ah a pung thung.

ASER 2022-ah hian zir chianna hi khaw tina sorkar sikul - primary school leh middle school-ahte neih a ni a; India ram pumah surveyor-te'n sorkar sikul - P/S 17,002 leh M/S 7,425 an tlawh a, Mizoramah chuan sorkar sikul 212 tlawhin, P/S 189 leh M/S 23 a ni.

Annual Status of Education Report 2022 hi Piramal Group leh Pratham Education Foundation-in an kalpui a ni a, nimin zing khan New Delhi-ah Piramal Group leh Pratham Education Foundation chairman Ajay Piramal-in a tlangzarh. Report hi vawi 17-na a ni a, elementary stage zirna bik zir chianna a ni.