Kum 10 Congress sorkar aiin kum 2 MNF sorkar mipuiin an ning - Zodintluanga
Congress Legislature Party (CLP) leader Zodintluanga Ralte chuan, MNF kaihhruai sorkar chu kum hnih pawh a la tling lo chungin mipuiin an ning hle tawh a, kum 10 chhung Congress sorkar aiin an ning tawh zawk niin a sawi.
Zodintluanga Ralte hian August 1, Inrinni khan Congress Bhavan-a Aizawl District Congress Committee (ADCC) Political Training-ah thu sawiin, chhan tam tak avangin MNF sorkarin mipui rin a hlawh tawh lo tih a sawi a, "Kum 10 Congress sorkar aiin MNF kum hnih sorkar hian mipui nin an hlawh tawh zawk. Party lian Congress bawk hi dingchhuak leh tho tur a ni tih hi mipui náwlpui rin dan a ni leh tawh," a ti.
Dingchhuak leh nghal turin Mizoram hmun hrang hranga Congress party mite rilru thar nen an chêt chhuah nghal a ngaih thu sawiin Zodintluanga chuan, "Mizoram mipui hian Congress thar hnuaiah beiseina thar neiin, kalphung thar an beisei hi an hmu ngei tur a ni," a ti a; chutiang tur chuan ṭhahnemngai turin an party mite a chah.
MPCC treasurer ni bawk Zodintluanga chuan, Congress sorkar hnathawh ṭhatzia mi ṭhenkhatin hre duh lo ṭhin mah se, Covid-19 vangin Congress sorkar hnathawh ṭhatzia a lang chhuak ta nia sawiin, "Congress sorkar khan hmasawnna hna lo thawk ṭha êm lo se chuan, Covid-19 vang hian dinhmun chhe lehzualah kan ding dawn a lo ni," a ti. Zodintluanga chuan, ZPM chu kum 2018 inthlanpui hnua pawl keh phel hmasa ber an nih avangin an hlauhawm loh niin a sawi bawk.
Zodintluanga thu sawi dang
1. Congress sorkarin Referral Hospital dinna tur cheng vaibelchhe tam tak a hnutchhiah chungin MNF sorkarin chhunzawm tlak loh khawpa chhiain a chhuah a, ar in atan hman a ni. Congress a sorkar leh a, Referral Hospital din thar lehin, medical college hial a din ta a, Covid-19 veite enkawlna hmunpui atan hman a ni ta hial.
2. Congress sorkarin a pawimawhzia hriain Bairabi rel station a siam a, rêl lian tlan theih turin a tilian bawk a, Covid-19 vanga phai aṭanga lo haw tam zawkte'n awlsam takin Mizoram an lo thlen theih phah.
3. Uchuak taka MNF sorkar fawng chelhtute'n compensation an lâk vanga an hluihlâwn tawh Tuirial Hydel Project chu Congress sorkarin tharthawhin a din thar.
4. Congress sorkar liam tain in ṭha pui pui Mizoram hmun hrang hranga a sakte chu Covid-19 quarantine centre atan ṭangkai taka hman a ni hlawm.
5. MNF sorkar kum nga a liam hnuah Covid-19 hi thleng ni ta se, an sum enkawl dan thlirin kan dinhmun a chhe ngawt ang. Sorkar hnathawk hlawh an pe kim thei lo a, mipui thawhkhawm hmangin Covid-19 an do a, ti ṭha an inti em em ringawt. Finance Minister berin sorkar sum kalhmang a hre thlâwt lo.