G20 leh B20 programme sawiho

Confederation of Indian Industry (CII) huaihawtin January 17, Thawhlehni khan G20 Meeting hnuaia B20 Programme chungchang hmarchhak bial huapin sawiho a ni a; hmarchhak state hrang hrang aṭangin online hmangin mi ṭhahnem tak an tel a, Mizoram aṭang pawhin mi eng emaw zat an tel.

Hmarchhak biala B20 programme neih tur sawihona hi External Affairs minister of state Dr Rajkumar Ranjan Singh-in a hmanpui a; India-in G20 president nihna a chelh meka sorkar aṭanga hotute pawh an tel a ni.

India ram khawpui hrang hranga G20 meeting neih tur hnuaiah CII hian Ministry of External Affairs leh hmarchhak state sorkarte thlàwpnain Mizoram, Manipur, Nagaland leh Sikkim-ahte B20 programme a huaihawt dawn a; B20 programme-ah hian G20-a tel ram hrang hranga sumdawngte tel tura beisei a ni.

B20 programme hi March 1-3, 2023 chhungin Aizawlah huaihawt tum a ni a, khawpui ṭhan zel dan tur ruahmanna, hmasawnna ruhrel leh thiamna tihhmasawn chungchangte sawiho tum a ni. February 17-19 chhungin Imphal-ah neih a ni ang a, March 16-19 chhungin Gangtok, Sikkim-ah leh April 4-6 chhungin Kohima-ah neih tum a ni bawk.