Covid-19 vei an awm avangin Sakawrdaiah curfew an puang

Sakawrdai Village Task Force chuan, an khuaa qua­rantine centre-a awm mek hmeichhe pakhat chu Covid-19 a vei tih August 1-ah hmuh chhuah a nih avangin, nimin tlai dar 3 aṭang khan an khuaah curfew an puang.

Sakawrdai VTF hruaitute hnen aṭanga Vanglaini thu dawn danin, Manipur aṭangin an khuaa awm ṭhin pakhat chu nau nei turin Sakawrdaiah a kal a, quarantine centre-ah dah a ni. State ramri paltlang an awm tih hi task force hriattir a ni lo a, nimin zinga Covid-19 a vei tih an hriat hnuah task force chuan an hre chauh a ni.

Manipur aṭanga nau nei tura Sakawrdaia kal hi mi pahnihin an hruai bakah, a chhungte'n chaw an pe ṭhin. Amah chu quarantine ni mah se, a hruaitute leh a chhungte chu nun dan phung pangngaia an awm avangin curfew an puang a, August 10 thleng a awh ang. Curfew puan a nih chhung hian office zawng zawng khâr a nih dawn a, an khua paltlang tur lirtheite erawh chu ding khawmuang loa tlân tlang an phal thung.