Covid-19 vei hmuh chhuah vangin khua/veng ṭhenkhat an fimkhur

Grand Hotel-a thawk mi pahnihin Covid-19 hripui an vei avangin, an chenna vengte'n nimin khan thuchhuah an siam nghal a, an veng mipuite fimkhur turin an chah. Hetih lai hian, Aizawl Venglai leh Sakawrdai khuaah chuan nimin chhun aṭang khan total lockdown puan a ni.

Grand Hotel-a thawk Covid-19 vei hmuh chhuahte hi Kulikawn leh Zemabawk North an ni. Zemabawk Local Task Force (LTF) hruaitute aṭanga thu dawn danin, an veng mi hi an ina a haw hnuhnun ber chu June 3, 2020 a ni a, hei vang hian an veng chuan inkharkhip an tum lo.

Kulikawn LTF hruaitute chuan Vanglaini palai zawhna chhángin, Grand-a thawk an veng mi chu an hotel, quarantine centre atana hman a nih hnuah an vengah a la haw lo tih sawiin, "A chhungte hnena a hlawh a pek pawhin mobile banking vekin a ti a, chuvangin, he thil thleng vang hian inkharkhip a ṭulna awm loah kan ngai," an ti.

Hetih lai hian, mi pahnihte'n August 1, Inrinni chawhma dar 10:30 vel khan Chanmari kàwna MYHAMZ dawr an tlawh a, hei vang hian dawr neitute chhungkua leh a kaihhnawihte chu an inah khung hran nghal an ni. Dawr neitute awmna leh dawra thawkte chênna veng - Aizawl Venglai chuan nimin chhun aṭang khan total lockdown an puang bawk.

Grand hotel awmna veng ṭhenawm, Zarkawt LTF pawhin thuchhuah siamin, "Khawtlanga ṭai darh (community spread) thei dinhmuna kan din avangin veng mipuite ṭul bik thilah lo chuan páwna chhuak lo turin kan inngen a ni," an ti.