Sorkar hnathawk hlawh a hun taka pek theih loh chhan 'State account-a hlawh daih tawk sum awm loh vang' - Finance department

Finance department hotute chuan, Mizoram sorkar hnathawk zinga a nghet (regular)-a thawkte a hun taka hlawh pek theih hun tur sawi a harsat thu an tarlang.

Sorkar hnathawk nghette hlawh pek tlai ṭhin chhan ber RTI Act hmanga zawhna chhángin Finance department chuan, "Sum leh pai indaih lohna vang leh hemi hun lai tak hi kan state account-a hlawh daih tâwk tur sum a awm loh vang a ni ber," an ti.

Finance department chuan, sorkar hnathawk nghette hlawh pe turin sorkar laipui aṭanga sum hmuh tur Share of Taxes leh Post Devolution Revenue Deficit Grant (PDRDG) aṭanga sum hmuh turte Mizoram state account-a a luh hun nghah ṭhin a nih thu an tarlang a, "A hun taka hlawh pek theih a nih hun tur sawi mai a harsa rih a ni," tiin an tarlang a ni.

Hetih lai hian, Mizoram sorkarin kum kal mek, 2022-23 chhungin December 2022 thleng khan hmun panga aṭangin cheng vbc. 1,119.12 a pûk tawh. Sum a pûk tamna ber chu Open Market Borrowing (OBM) aṭangin niin, cheng vbc. 840 a pûk tawh a, a pûk tlemna ber NCDC aṭangin cheng vbc. 2.68 a pûk thung.

RTI Act hmanga zawhna chhannaa a lan danin, Mizoram sorkarin OBM aṭangin ṭum sarih pawisa a pûk tawh a, Special Assistance to States for Capital Investment (SASCI) aṭangin ṭum thum pûk tawhin, cheng vbc. 177.63 a pûk tawh.

National Bank for Agriculture and Rural Development (NABARD) aṭangin ṭum 13 pûk tawhin, cheng vbc. 94.90 a pûk tawh a, REC aṭangin ṭum khatah cheng vbc. 3.91 leh National Cooperative Development Corporation (NCDC) aṭangin ṭum hnihah cheng vbc. 2.68 a pûk tawh bawk.

Mizoram sorkarin financial year 2022-23 chhunga OMB hmanga RBI aṭanga sum a pûk theih zat chu cheng vbc. 990 a ni a, cheng vbc. 840 pûk tawhin, vbc. 150 a la pûk thei a ni.

Thu dawn danin, Mizoramin OMB hmanga sum a pûk theih nan Reserve Bank of India (RBI)-in a buaipui ṭhin a; OMB hmanga Mizoram sorkarin sum a pûk lehna tur zawn a nih thu December 16, 2022 khan RBI chuan an tarlang. OMB hmanga sum pûk a nih theih nan RBI-in state sorkar tan sum pûk tur a zawng a, financial institution-te'n an chháng ṭhin.