KR Construction-in lei an dawh mekah hmanraw ṭha lo vangin chawlhtir rih

Meidum khaw bula Meidum-Hortoki kawnga KR Construction-in lei an dawn ṭan mekah hmanraw ṭha lo an hmang nia hriat a nih avangin Mizoram PWD-in hna chawlhsan rih turin an hriattir. An hmanraw hman tawhte endik mek niin, hmanraw ṭha lo an hmang a nih chuan a ṭul angin chhut chhiat thlenga hmalak tum a ni.

Meidum-Hortoki kawng siam, 'Construction of Meidum-Hortoki Phase-II (km. 9.100 to km. 26.00) tih hi hna thawktu contractor chu KR Construction a ni a, a neitu chu Kamlova Chhangte (Kamrul Laskar), Ṭhuampui, Aizawl a ni.

PWD hotute hnen aṭanga thu dawn danin, Meidum bula KR Construction-in lei an dawh meka a bulṭhut (foundation) siam lai chu nikum lam khan PWD, Kolasib Division hotute'n an lo enfiah tawh a, cement leh rawra an hmante a ṭhat tâwk loh avangin chawlh lailâwktir an ni.

Hna chawlh lailâwktir an nih hnuah KR Construction chuan hmanraw ṭha tawk lo an lâk khawm sate chu an hmang leh ta tho nia hriat a ni a, chuvang chuan Kolasib-a PWD hotute chuan January 17, 2023 khan endik nawn lehin, hmanrua an hmante chu endik (test) a ni dawn a, test result a chhuah hma chuan hna chawlhsan rih turin an hriattir a ni.

Lei dawh mek endik hmasak ṭumin KR Construction-in cement leh rawra an chhêk khawm sate chu a ṭhat tâwk loh avangin hmang lo tur leh phur let turin an hriattir tih sawiin PWD hotute chuan, "Kamrula pawhin 'Kan phur lêt leh anga a ni mai alawm,' tiin min chháng," an ti a; chutih laiin, hmanraw ṭha eng emaw zat a awm reng bawk thu an sawi.

KR Construction-in cement leh hmanraw dang an hmante chu an endik mek a, result a la chhuak lo tih an sawi a; hmanruate chu ṭha tawk lo ni se, an hmalak zui dan tur zawhna chhangin PWD hotute chuan, "Tih dan hrang hrang a awm thei ang a, tih dan tur tihchian a la awm lo. Foundation an chhûn tawhte chu tih chhah theih a ni a, chhut chhiat pawh a ṭul thei. Bul an ṭan chauh a, foundation an chhung ṭan chauh a, engtin pawh ti ila, harsatna a awm lo turah kan ngai," an ti.

PWD hotute chuan, lei dawhnaa hnathawh chu PWD mi leh sa enpui loha thawk lo tura an hriattir thu an sawi rualin, Krismas/kumthar hunpui chawlh laiin ni hnih chu PWD mite enpui lohin foundation an lo chhûng tih an sawi.

Construction of Meidum-Hortoki Phase II-ah hian date of agreement chu December 3, 2021 a ni a, hna ṭan ní tura tih chu December 18, 2021 niin, June 18, 2023-ah zawh tura ruahman a ni. Kawng siam nan Rs 14,22,146.64 ruahman a ni a, NABARD aṭanga hmuh a ni.

Hetih lai hian, an hna a ṭhat loh avangin PWD chuan KR Construction-in Meidum-Hortoki kawnga lei dawh hna an thawh mek chu PWD (Highway Division) kutah dah an tum a, file a kal mek nia thu dawn a ni.