Aitlanga hmunphiah la seng thei lo; sorkar thuneitute thu an ngaichâng

Vairengte Aitlang hnâr lam Assam ramri hnaiha Vairengte mi, hmunphiah huan neitute chuan an hmunphiahte seng duh tawh mahse Assam police-te'n an phal loh avangin an la seng thei lo zel a, Mizoram sorkar thuneitute hmalakna an ngaichâng mek.

Tarlan tawh angin, tunlai hi hmunphiah keh hun a ni a, Vairengte mi, Aitlanga hmunphiah huan neitute chu January 13, 2023 khan an hmunphiahte keh tumin an kal a ni. Mahse, Assam police-te'n kuminah chuan hmunphiahte chu seng phalsak an nih dawn loh thu an lo hrilh avangin an seng thei lo.

Hemi chungchangah hian Vairengte SDO (Civil) hoin police hotute nen hmunphiah neitute chu January 16, 2023 khan an ṭhukhawm. Thuneitute chuan Assam police duty-te an biak pawh tawh thu leh hmunphiahte an keh theih ngei tur thu hmuhphiah neitute an hrilh. Sorkar thuneitute'n an hmalakna ngaichâng tura an tih angin hmunphiah neitute chuan an ngaichâng mek.

Vairengte SDO pisa chuan hmunphiah huan neitute chu identity card a siamsak mek a, ID card chu Assam police-te'n ram neitu an ni ngei tih an hriatna tur leh an lo dan lohna tura tih a ni.