KHAWTHLIR

Krismas pualin thisen unit 1,928 pe
Association for Voluntary Blood Donation, MSACS leh blood bank-te ṭangrualin December 2022 chhunga Krismas puala Aizawla thisen pêk an huaihawtah thisen unit 1,928 pek a ni. Thisen pek zat hi Civil Hospital, Aizawlah unit 1,661 leh Synod Hospital-ah unit 267 a ni a; AVBD chuan thisen petute chungah an lawm tak zet thu an sawi a ni.

Heroin man
Excise & Narcotics Department leh 42nd Assam Rifles-te thawk dun chuan January 18, Nilaini tlai dar 4 khan Ruantlang khaw bula Farlui kawngah heroin gram 580.400 (hawng 50) an man a, Rs 2,90,20,000 hu a ni. Heroin neitua puh Vanlalrina (32) s/o Ralluaia (L), Khawmawi, Myanmar leh Vanlalsangliana (34) s/o JH Lalhreliana, Champhai Venglai nia insawite an man bawk a, an lakah NDPS Act tlawhchhanin thubuai ziah luh niin, nimin khan court-ah hruai an ni.

Minister-in hmanpui
Minister Lalrinawma chuan nimin khan Hualtu khuaah Ṭawi tlang Block MHIP Conference vawi 11-na a hmanpui a, thupui chu 'Tu leh fate ruihhlo laka fihlim tura ṭan lak' tih a ni. Minister chuan, "Kan fate hnenah ngaihhlut tur dik kan zirtir uar a ṭul. Mipuite'n nun kawng dik kan zawh theih nan mahni fate ṭheuh hnenah taima taka kan tuh ṭhin a ṭul hle a ni," a ti.

Khualbûk hawng
Mamit bialtu MLA H Lalzirliana chuan nimin khan Mamita damlo awmpuitute khualbûk, Patient Attendants' Shelter sak thar a hawng. Khualbûk hi DAY-NULM hnuaia Shelter for Urban Homeless Component sum nuai 33.80 hmanga sak a ni a; khum 10 awmin, mipa leh hmeichhe pindan leh choka siam a ni.

Year of Millet
Agriculture department chuan nimin khan Lawngtlaia an department conference hall-ah International Year of Millet 2023 pualin buhtun (millet) ṭhatna leh chíng uar tura inzirtirna an buatsaih a, Lawngtlaia village council aiawhte leh kut hnathawktute an tel. Kut hnathawktute chu tunlai thiamna leh zirchiannate chhawr thei tura Agriculture department mithiamte ráwn ṭhin turin chah an ni.

Vawiinah Páwl Kût
Social Welfare & Tribal Affairs depart­ment huaihawtin vawiin leh naktukah Lammualah Páwl Kût hman a ni dawn. Pâwl Kût hi chawhma dar 11-ah ṭan a ni dawn a, hnam lâm leh zai chi hrang hrang entir a ni ang.
Vawiinah chuan Social Welfare minister Lalrinawma kûtpa a ni ang a, naktukah chief minister Zoramthanga leh Art & Culture minister R Lalzirliana ten an hmanpui dawn a ni.