Hmeichhia kum 9-14 inkar 60,000 hnenah chhùl hmáwr cancer laka invênna pek tum

State Task Force Committee for Immunization chu nimin khan an chairman Esther Lalruatkimi, Health & Family Welfare secretary kaihhruaiin a pisaah an ṭhukhawm a; kum 2023-24 chhungin Mizorama hmeichhia kum 9-14 inkar mi 60,000 vel hnenah chhùl hmáwr cancer laka invenna damdawi (vaccine) pek tum a nih thu an tarlang.

Ṭhutkhawmah hian kumin January 1 aṭanga kalpui zenghri danna fIPV (fraction Inactivated Polio Vaccine) te, December 2023 ral hmaa sentût (measles rubella) tirêm tura sorkar laipui hmalakna kalpui dan tur te, chhùl hmáwr cancer venna te, Human Papilloma Virus Vaccine pek dan tur te, Covid-19 vaccine bakah, vaccine dang late chhinchhiahna tur U-WIN platform Aizawl leh Lawngtlai district-a kalpui chhin dan turte an sawiho a ni.

Ṭhutkhawma tarlan danin, khawvelah India ram chu hmeichhe chhùl hmáwr cancer tamna ber pahnihna a ni a, chhùl hmáwr cancer tam ber chu Human Papilloma Virus vang a ni tih hmuh chhuah niin, hei hi vaccine hmangin 99.9% a vên theih tih hriat a ni.

Sorkar laipui chuan kum 2023-24 aṭangin hmeichhe naupang/tleirawl kum 9-14 inkar tan a thlàwnin chhùl hmáwr cancer laka invên nan vaccine a pe dawn a, vaccine kalpui hmasakna tur state pasarih zingah Mizorama tel. Health department chuan mi 60,000 vel tinzâwnin ruahman an siam a ni.

Kum 2014 aṭang khan India ram chu zenghri laka fihlîm tawha puan a ni chungin, ṭhenawm ram aṭanga natna hri lo lut thei a nih avangin polio vaccine pek chhunzawm zel a ni a, Ministry of Health & Family Welfare thu angin January 1, 2023 aṭangin India ram pumah fIPV dose thuma pek ṭan a ni. Naupangin thla kua a tlinin fIPV hi sentût venna a lak rualin pek tur a ni a, vaccine dose thuma lak hnuah naupang chu zenghri lakah 98% velin a véng tura ngaih a ni.

Prime minister Narendra Modi-a'n December 2023-ah India rama sentût tirêm tura hmalak a tiam tawh angin India ram district tina naupang 95% hnenah vaccine dose khatna leh dose hnihna pek vek tur a ni a; naupang kum 5 la pumhlûm lote'n vaccine dose hnih an la ngei tur a ni bawk.