Mi harsa zawkte tan buhfai Kg. 3 subsidised leh phut

Mizoram Pradesh Youth Congress Committee (MPYCC) hruaitute chuan nimin khan tunhnaia mipuite hnena ration buhfai pek tihdanglam chungchangah Food Civil Supplies & Consumer Affairs Directorate an tlawh a, mi harsa zawkte tan buhfai kg. 3 subsidised leh ngei an phut thu an sawi.

MPYCC President chuan sorkar laipuiin National Food Security Act (NFSA) 2013 a hman ṭan aṭangin Priority HouseHold (PHH) te tan kg. 5 Rs. 3 in a rawn tum sak ṭhin tih sawiin, "Mizoram sorkarin khamkhawp lo ven nan kg. 3 PHH-te tan AAY rate-in a pe tel ṭhin a ni," a ti.

December 24, 2022 khan Union Cabinet chuan thuchhuahin NFSA hnuaiah PMGKAY hmangin, December 2023 thleng PHH-te tan mi pakhatah kg. 5 leh AAY-te tan card khatah kg. 35 a thlawnin buhfai a sem tawh dawn tih Dr Lalmalsawma chuan a sawi.

Dr Lalmalsawma chuan Mizoram sorkarin PHH-te mi pakhat tan kg. 5 an khawp kham lo tih hriaa, an khamkhawp lohna phuruk nan AAY rate a kg. 3 a pek ṭhin a tawp dawn nia an hriat thu sawiin, "Mizorama chhawmdawl mamawh ber miharsa zawk leh dinhmun ṭha lo zawk mangang taka a siam hi pawi kan ti takzet," a ti.

Mizoram sorkarin chhawmdawl leh ngaihven hlawh ngai ber te tan kg. 3 AAY subsidised rate a an lak chhunzawm theih nana ruahmanna a siam lo tak tak a nih chuan an enliam mai dawn lo tih sawiin MPYCC President chuan, a ṭul angin miharsa zawk te leh chhawmdawl ngaite tan MPYCC a ding zel dawn tih Mizoram sorkar a hriattir thu a sawi bawk.