Governor hoin TB chungchang sawiho

Governor Dr Hari Babu Kambhampati chuan nimin khan Health & Family Welfare department hotute Raj Bhavan-ah a kâwm a; ngawr (tuberculosis) donaa hmalakna, Prime Minister TB Mukh Bharat Abhiyan hmanga hnathawhte leh thil dangte a sawipui.

Inkawmhonaah hian Health secretary Esther Lal Ruatkimi'n PM TB Mukh Bharat Abhiyan chungchang sawi hawngin, Mizorama hmalakna tlangpui leh hmachhawpte a sawi a; National Health Mission (NHM) mission director Dr Eric Zomawia'n power point presentation hmangin Mizorama PM TB Mukh Bharat Abhiyan kalpui dan leh TB dinhmun a sawifiah.

Dr Hari Babu Kambhampati chuan, an inkawmhona hmasa leh nimina inkawmhona inkarah hmasawnna hmuh tur a awm tih sawiin, TB laka mipui himna tur leh TB ûm bo tura Health department-a thawkte inpekna leh thawhrimna a fak a; chutih rualin, TB-ah Mizoram chu a ziaawm pawl ni mahse ṭan lakna tur a la awm tih a sawi.

Governor chuan, TB damdawi eitir mekte vil uluk a pawimawh thu sawiin, "A bik takin damdawi ei ṭhat loh vanga TB natna enkawl dam theih loh vei an awm lohna turin ṭan lâk mar pát a ngai a ni," a ti.

TB veite chhawmdawl chu rawngbawlna pawimawh a nih avangin MLA zawng zawng hnenah lehkha hmangin ngenna a pe tawh tih a sawi bawk.