National Defence College hotute lo zin dawn

Sorkar laipui Ministry of Defence hnuaia National Defence College (NDC), New Delhi-a training lai sipai hotu lute leh zirtirtute chuan January thla tawp lamah Mizoram an rawn tlawh dawn.

NDC hotute rawn zin turte hi mi 18 an ni a; Mizorama lo mikhual dan tur ngaihtuahin nimin khan Home secretary Lalengmawia hoin Secretariat Conference Hall-ah a kaihhnawih sorkar official-te an ṭhukhawm a ni.

NDC hian India rama state-te leh hnam hrang hrangte nunphung zir turin Understanding India Study Tour an nei mek a, Mizoram pawh an tlawh dawn a, January 29, 2023-ah Mizoram rawn thlengin, February 4-ah an chhuahsan leh ang.

Mizorama an chàm chhung hian Aizawl, Serchhip leh Kolasib district-te an tlawh dawn a; mipui hmasawnna leh chawikanna lam hawia sorkar hmalakna - thingtlang tihhmasawnna lam leh inrelbawlna, dan leh thupek kenkawhna, hmeichhiate dinhmun, hriselna, zirna, kawlphetha lam leh tlawmngai pawlte hmalak dante an zir dawn a ni.

District hrang hrangah sorkar hmun pawimawh te, hmasawnna hnathawh mekte an tlawh dawn bakah, sorkar hotute leh tlawmngai pawl hruaitute nen an inkawm dawn bawk.