MLA-in Lunglei H/S lawmna a hmanpui

Lunglei High School chuan nimin khan an din champha kum 75-na an lawm a, Human Resource & Development Board vice chairman Dr L Thangmawia, MLA-in hmanpuiin, jubilee lungphun a hawng a, lawmpui nan Rs 20,000 a pe.

Dr L Thangmawia chuan, Lunglei H/S chu Mizoram zirna meichher chhi hmasatu leh mi hlawhtling tam tak chher chhuak tawhtu a nih thu sawiin, zirlaite chu Mizoram tihmingṭhatu ni turin taimakna leh insûmtheihna neia bei zel turin a chah.

Hripui léng karah Mizoram sorkarin zirna lamah nasa takin ṭan a la tih sawiin L Thangmawia chuan, "Kum 2018 December thlaa MNF sorkar a pian hnuah zirtirtu 958 an pension tawh a, zirtirtu regular 152, muster roll 880, SEDP hnuaiah 771 lak an ni. Hei hian zirtirtute'n an hlawh thawh khawma an rawih te, khawtlangin sum sênga an rawih ngai tur tam tak a chhâwk zângkhai hle," a ti.

Jubilee lawmnaah hian School Education director Dr H Lalthlangliana chu khualzahawm a ni a, tlaiah jubilee ruai an ṭheh a ni.