Grand Hotel-a thawk 2-in Covid-19 an vei Hotel-a thleng zingah hripui vei la hmu lo

August 1, 2020-a Covid-19 vei hmuh chhuah zingah Grand Hotel, Chanmari-a thawk mi pahnih an tel. Hei vang hian Aizawla veng ṭhenkhatah total lockdown puan a ni. Grand Hotel hi man chawia inkhunghranna (paid quarantine) atana hman mek a ni a, he hotel-a khung hran (quarantine) zingah Covid-19 vei hmuh chhuah an la ni lo.

Grand Hotel awmna veng, Chanmari Veng Local Task Force (LTF) hruaitute hnen aṭanga Vanglaini thu dawn danin, Grand Hotel hi quarantine centre atana hman a nih avangin thawktute chu khung hrante rualin an swab sample endik ve nghal a ni ṭhin. 

Inrinnia Covid-19 vei hmuh chhuah tâkte pawh hi ṭum hnih an endik tawh a,  hripui an kai lo (negative) a; sorkar thuchhuah tarlan danin, 'tun hnaiah COVID-19 mild symptoms an neih avangin test leh an ni a,' vawi thum­naah an vei tih hmuh a ni a; nimin zing khan State Referral Hospital (ZMC)-ah dah luh an ni.

Grand-a quarantine zingah hripui kai hmuh an la awm loh avangin an kài chhan awm sawi tur an hre lo. Grand Hotel-a thawkte hi an chhuak tam lo a, ei leh in turte lei khâwlin, an neih loh hunah lei turin an chhuak ṭhin. Tun hnaia thil an leina ṭhin dawrte chu inhawng rih lo tura tih an ni a, an kalna dawra thil lei ve mi dangte pawh thuneitute hnena inhriattir tura tih an ni.

Chanmari LTF chuan thuchhuah siamin, Grand Hotel-a thawk Covid-19 vei hmuh chhuahte'n August 1, Inrinni khan Chanmari-a dawr pakhat MYHAMZ an dàwr tih an tarlang a, "August 1 chawhma dar 10:30 leh a hnu lama he dawra kal zawng zawngte chu mahni  hriselna endika fimkhur taka páwnchhuak loa mahni ina inenkawl turin hriattir an ni a, phone no. 9862365880-ah inhriattir tur a ni," an ti.

August 1 chawhma dar 10:30 leh tlai dar 3 vela Chanmari bazara kal zawng zawng pawh an hriselna dinhmun chîk a, páwn lama chhuak lo tura tih an ni a, Chanmari veng mipui zawng zawng pawh páwna chhuak tam lo tura ngen an ni bawk. Chanmari LTF chuan tun awm mekte'n an hun an hman zawh aṭangin Grand Hotel chu quarantine centre atan hman chhunzawm an phal tawh lo a ni.