KHAWTHLIR

August 1, Inrinni khan KTP, Bethlehem North Branch chuan Synod Hospital blood bank-ah kal chilhin thisen unit 18 an pe a, petute mipa 16 leh hmeichhia pahnih an ni. Leitlangpui Liverpool FC Fans Club pawhin Premier League-a Liverpool champion lawm nan Lunglei Civil Hospital-ah thisen unit 18 an pe bawk a, petute zinga hmeichhia pakhat a tel.

Tanpuina hlân 

North East Initiative Development Agency (NEIDA) chuan August 1, Inrinni khan Tlabung huam chhunga Covid-19 vanga harsatna tâwk chhungkaw 100 hnenah ṭanpuina chi hrang hrang an hlân. Ṭanpuina an pekte chu silpauline 100, buhfai ip 104, alu ip 10, tél báwmpui 17, dâl ip 10 leh chini ip 16 a ni.

August 1, Inrinni khan Rapid Antigen Test (RAT) hmangin swab sample pasarih endik a ni a, Covid-19 positive an awm lo. Lengpui Airport-ah pahnih, Serchhipah pakhat leh Zoram Medical College-ah pali endik a ni.

Republic Veng Branch YMA chuan August 1 khan an venga zirlai tiṭhate chawimawina an buatsaih a, Minister of state Robert Romawia Royte-in a hmanpui. Minister chuan, mi taima tan hna thawh tur a harsat loh thu sawiin, "Hna hmu tlak tura zir a ngai a, tih tak zeta in zir chuan hna a awm a ni," tiin zirlaite a fuih. He hun hi Central YMA vice president Lalhmachhuana pawhin a hmanpui a ni.

August 1, 2020 tlai dar 4 thleng khan hotel/paid quarantine facility hrang hrangah mi 102 an la awm. Hotel-ah hian mi 169 khung hran an ni tawh a, mi 66 chhuak tawhin, pakhat chu isolation ward-ah sawn a ni. Hotel/paid quarantine facility hi Aizawla hotel pariatah ruahman a ni.

Aizawl South-I bialtu MLA C Lalsawivunga chuan August 1, Inrinni khan Bethlehem Branch YMA-in an huam chhunga zirlai HSLC leh HSSLC pass tharte lawmpuina leh fuihna inkhawm, YMA Hall-a buatsaih a hmanpui a, zirlaite chu thinlung taka a lawmpui thu leh tum mumal tak nei tura a duh thu sawiin, an zir zelna turah duhsakna a hlân. MLA hian zirlai pass tharte hnenah English-Mizo Dictionary a pe ṭheuh a ni.