CM-in Kawrtethawveng RD Block a hawng; Zu leh ruihhlo hi ram hmelma a ni - CM Zorama

Chief minister Zoramthanga chuan nimin khan Kawrtethawveng RD Block a hawng a, Mizorama Rural Development block 27-na a ni. CM hian Ngawngkawltlanga BDO pisa thar sakna tur lungphùm a phúm nghal a, zu leh ruihhlo chu ram hmelma a nih thu a sawi.

CM Zoramthanga chuan, Kawrtethawvengin RD block an nei ta chu chhuàn la awm leh zel tur tan hmasawnna thlentu a nih a beisei thu sawiin, "Sorkar inrêlbàwlnaah block level aṭanga development kal chhohpui hi hmasawnna thlentu pawimawh tak a ni," a ti a; pisa sakna tur emaw, pisa panna tur kawng siamna emaw, mamawh dangte pawh bawhzui zel a nih tur thu a sawi.

Zu leh ruihhlo chu Mizoram hmelma a nih thu sawiin Chief Minister chuan, "Mihringte kan nih theih tur ni thei loa min siamtu a nih avangin do tlat tur kan ni. Ram ṭha tak, hausa taka kan siam theih hi ṭangkaia kan hman a, hmasawnna a thlen zel theihna tur chuan keini pawhin kan tih tur chinah theihtawp kan chhuah a ṭul," a ti.

RD minister Lalruatkima pawhin thu sawiin, "RD block-a puan satliah chauh ni loin, a fûke kima BDO leh a pisa turte tihfel vek a ni hi a lawmawm," a ti a; sorkar chu mipui tan a nih avangin hmasawnna rualkhai tak thlen zel turin hmalakna tam tak sorkarin a neih mek thu a sawi.

RD block hawnnah hian minister of state Robert Romawia Royte, bialtu MLA Lalrindika Ralte leh MLA dang pahnih Zothantluanga leh K Laldawngliana te pawh an tel.

Kawrtethawveng RD Block hi May 20, 2022 khan siam a ni a; khaw 56 awmna Zawlnuam RD Block aṭanga ṭhen niin, khaw 21 leh sub-village pakhat a huam dawn. RD Block thar vil turin BDO, assistant, inspector of statistics, UDC leh LDC pakhat ṭheuh an awm dawn a, chu'ng atan chuan sorkarin October 7, 2022 khan post thar a siam tawh a ni.

MNF president Zoramthanga hian nimin vék khan Ngurlianthanga Hall, Kawrthahah Hachhek Joint MNF Block conference a hmanpui nghal a, Congress party chu Delhi lama khawnvartui búr a buak tawh avangin, a phita a rawp ral mek nia sawiin, "Mizoram ah pawh a rawp ral mek a, beisei tur an awm tawh lo a ni," a ti.

ZPM chungchang sawiin Zoramthanga chuan, "A tirah peoples' movement kan ni e, tiin an inzuar a, tunah chuan an nihna a lang tawh. Election Commission-ah in register-in, unit te an din ve ta zel. An inzawrh ang an ni lo a, kan hrechiang zel," a ti a, ZPM-ah beisei tur a awm loh thu a sawi.