KHAWTHLIR

KTP conference
Kristian Ṭhalai Pawl (KṬP) pastor bial hrang hrangte chuan nizan aṭang khan bial conference an hmang ṭan a, Pathianni zanah a ṭiak ang. KṬP bial conference-ah hian nizan khan palai lawmna leh report inkhawm neih a ni a, vawiinah rorel inkhawm neih a ni ang. Inkhawmpui hi Central KṬP hruaitute chuan hmun hrang hrangah an hmanpui a ni.

Lehkhabu Chhiar Ni
Serchhip DIET chuan nimin khan Lehkhabu Chhiar Ni (Reading Day) an hmang a, Serchhip bawrhsap Nazuk Kumar-i'n a hmanpui. Bawrhsap chuan, lehkhabu chhiar tam a pawimawh thu sawiin, ni tin lehkhabu phêk khat tal chhiara bul ṭan thar turin mipui a chah a; Serchhip District MJA president C Lalhminghlua'n thu a sawi bawk. Reading Day-ah hian DIET tualah a duh apiang chhiar turin lehkhabu chi hrang hrang chhawp a ni.

Minister-in enfiah
Minister K Lalrinliana chuan nimin khan a bial chhunga Meidum, Pangbalkawn leh Bairabi-a sorkar department hrang hrang hnathawh leh MLA-LADS hmanga hnathawhte a enfiah. K Lalrinliana chuan, sorkar hmalaknaa hmasawnna ruangam siamte chu mipui ta tur a nih angin uluk taka vil a, neitu nihna rilru nen enkawl ṭhin turin khawtlang hruaitute a chah.

FPO din sawiho
Lawngtlai District Monitoring Committee chu an chairman Amol Srivastava, bawrhsap kaihhruaiin nimin khan an ṭhukhawm. Centrally sponsored scheme pakhat, Formation and Promotion of 10,000 FPOs hmalakna hnuaia Lawngtlai district-a Bungtlang South, Chawngte leh Sangau RD block chhunga kut hnathawktute intêl-khawmna Farmer Pro-ducer Organisation din chungchang sawiho a ni.

MLA-in tlawh
Siaha bialtu MLA Dr K Beichhua chuan nimin khan a bial chhunga Amotlah tlángdung a tlawh. Khawtlang hruaitute nen an inkawmnaah K Beichhua chuan, minister of state aṭanga bàn a nih chungchangah tu lakah mah a vui loh thu a sawi. Dr K Biachhua hi MADC chairman N Viakhu leh Siaha district MNF-a hruaitu ṭhenkhatin an ṭawiawm a ni.