MPCC-te chhim lama hmasawnah an inngai

Mizoram Pradesh Congress Committee (MPCC) chuan thuchhuah siamin, Mizoram chhim lamah Congress party-in nasa takin hma a sawn mek niin an tarlang.

MPCC chuan, nimina Congress Bhavan-a inkhawmah January 16-18, 2023 chhunga an president Lalsawta'n Lunglei leh Chakma khuate a tlawh chungchang ngaihthlak a ni tih tarlangin, "Mizoram chhim lamah Congress party-in nasa takin hma a sawn mek. Chhim lam mipuiin sorkar ṭha siam tum Congress party an zawm nasa hle," an ti.

MPCC president Lalsawta-ah ṭhalaite'n rinna an nghat lian hle nia sawiin MPCC chuan, "Ṭhalai lehkhathiamte'n Congress an zawm nasa hle. CADC area-ah phei chuan ṭhalaite'n ni tin Congress party an zawm thar reng a ni. CADC inthlan turah pawh candidate tur ṭhalai ṭha tak tak an ni dawn a, hei hian ṭhalaite a tiphûr hle a ni," an ti a; MADC inthlan turah Congress hmel thar an hmu a, lawmawm an tih thu an tarlang.

Congress party chuan, Lunglei Municipal Council inthlan awm turah nasa takin an inbuatsaih mek tih sawiin, "Committee hrang hrang din vek a ni tawh a, Lunglei khawpui tana ding ngam candidate ṭha tak tak kan nei thei dawn a ni," an ti.