Sorkarin Kamrula a vûr reng, a hna ṭha loah pawh hrem a tum ngai lo - ZPM Working President

ZPM working presi­dent K Sapdanga chuan, Mizoram sorkarin a hnathawkte a hun takah hlawh a pek theih loh lai leh pension sum leh health care bill-te a tàn ṭhup laiin, Kamrula erawh chu an vûr mawlh mawlh reng a, a hnathawh ṭha loah pawh sorkarin hrem a tum ngai loh thu a sawi.

Nimina ZPM pisaa inkhawmah thu sawiin K Sapdanga chuan, sorkarin a hnathawkte hlawh a hun takah a pe thei lo a, pension sum, health care bill, sorkar hnathawk TA/DA leh tar châwmnate a bá tih a sawi a, "An duhsak zawng Kamrula erawh an vûr mawlh mawlh reng. A hnathawh a ṭhat loh thu report a awm chung leh PWD pawhin a hna thawh mek an tihtawpsak chung pawhin a chungah action lak tumna a awm miah lo. Sorkar kalphung pangngai chu ni se, an man ang a, kumkhuaa contract hna thawk thei tawh lo turin an blacklist tawh ngei ang," a ti.

K Sapdanga chuan, Kamrula chu airport sa chimtu a nih thu sawiin, "He sorkar hian mipui zingah rilṭáma thi an awm palh ang tih hlau hleithei lo khawpa rethei anga a awm laiin, a con­tractor chuamte tan erawh chuan bill a táng ve ngai miah lo," a ti a; hna­thawh tihtawpsak ngai khawpa Kamrula hnathawh a chhe chung pawhin Mizoram sorkarin a la vulh zel thu a sawi.

Mizoramin airport neih chhuna zin mite tana bungraw nawrnate chu cement leh balu thiar nan an hmang chhe deuh vek tawh tih sawiin Sapdanga chuan, "Ram dang mite lakah kan ram hmai tibâltu a ni a, a mualphothlâk hle," a ti.

K Sapdanga chuan, sorkar laipuiin a thlawna buhfai sem avangin Mizoram sorkarin ration card pawl (PHH) neite tana mi pakhatah kg. 3 a belh ṭhin chu tihtawp a tum tih a sawi a, "Mipui phunna leh sawiselna a tam avangin a thu thlakin, kg. 3 chu Rs 15-a lei turin a ruahman leh ta a ni," a ti a; sorkar laipuiin a thlàwna buhfai a pek lo do letna tak ngial pawh Mizoram sorkarin a tih hleitheih tawh loh thu a sawi.

ZPM Working President chuan, cheng khat hlawh tura OSD to CM chu a nuamsa thei ang berin sorkarin a thuam a, ṭul loah mipui sum tam tak khawhral a ni tih sawiin, "Heng zawng zawng hi mipuiin an hmuh hmaih lo a, vote hmanga chinfel an tum mek a ni,” a ti bawk.