Bilkhawthlirah kuhva an man leh; hâl a ni

Kuhva Chingtu Cooperative Society, Bilkhawthlir (KCCSB) duty-te chuan nimin zing khawvar hlim khan Bilkhawthlir dái, Buhchang péngah Vairengte lam aṭanga Kolasib lam pan truck pakhat aṭangin Myanmar lam kuhva rah ro dan loa lak luh nia hriat an man a, hâl zui a ni.

KCCSB duty-te'n kuhva rah ro an manna truck hi NL-02 Q-1594 a ni a, truck body-ah hian chhuat chhâwng a awm. Duty-te'n an enfiahnaah chhuat chhâwng hnuai zawkah kuhva tam tham tak ipa khung loh an hmu chhuak a, an man nghal a ni.

Kuhvate chu leiah an buntir a, chumi hnuah hâl a ni. Kuhva an mante chu ipah khung a nih loh avang­in a zat hriat a ni lo a, ip 80 vel a nih an rin thu KCCSB secretary Van­lal­hmuaka chuan Vanglaini a hrilh.

Hetih lai hian, nimin zinga kuhva rah an man hma hian dan loa lâk luh kuhva phur nia hriat truck pahnih chu enfiah hman lohin Bairabi kawng lamah an tlân liam a, KCCSB duty-te'n an ûm zui bakah, Bairabi police hnenah an hriattir nghal a, mahse, he thu ziah lai thleng hian man a la ni lo.

Zawhna chhangin Vanlal­hmuaka chuan, truck pahnihte chu duty-te'n ûm zui mahse an hmu rih lo tih a sawi a, "Ṭhál lai a ni a, kawng lakah han bîkbona tur leh kuhva rahte han bun bo daih theihna tur hmun tam tak a awm a, tun thlengin kan la hmu lo. Bairabi police lam pawhin an man lo niin kan hria," a ti a; kuhva phurh nan hrim hrima tihdanglam truck/tipper eng emaw zat a awm tawh thu a sawi bawk.

Hetih lai hian, Vairengtea kuhva chíngtu pawlte pawhin kuhva ro Myanmar aṭanga dan loa lâk luh tihtàwp a nih theih nan hma la turin sorkar an phût a; Vairengte chhehvela kudam neitute chu January 2023 ral hma ngeiin an kudama kuhva dahte senghawi vek turin an hriattir a, hun tiam a ral chuan a theih ang anga hmalak an tum nia thu dawn a ni.