Tlawng lei dawh an enfiah

Reiek kaia Tlawng lei (BUG bridge) dawh mek chu a dawhtu contractor Sadguru Engineer & Allied Services Pvt. Ltd., Assam-in hna an thawh muan em avangin leh zawh hun tur bitukah an zo hman dawn lo nia a lan avangin nimin khan PWD hotute leh YMA hruaitute'n a hmunah an enfiah a; chak tak leh ṭha taka thawk a, zo thuai turin contractor an hrilh.

Tlawng lei dawh mek enfiahnaah hian PWD aṭangin executive engineer Lalbiaksângi leh thawktu dangte an kal a; YMA aṭangin Central YMA vice president Lalhmachhuana leh CEC member pathum kalin, YMA Khuangchera Group, Reiek Branch leh Ailawng Branch YMA hruaitute an tel. YMA hruaitute chuan, a ṭul ang anga nawr zui zel an tum thu an sawi.

Thu dawn danin, Reiek kai Tlawng lei dawh turah hian February 8, 2017 khan PWD leh Sadguru Engineer & Allied Services ten inremna an siam a, February 28, 2019-ah dawh zo tura tih an ni. Harsatna hrang hrang vangin hna thawh zawh hun tur chu May 31, 2021 thleng pawhsei a ni. Kut thlâkna hmuh tur mumal a awm chuan loh avangin PWD-in hmun hnih aṭangin contractor chu show cause notice pein, insawifiah turin an hriattir bawk.

Management meeting hnuhnung berah Sadguru Engineer & Allied Services hotute chuan February 28, 2023-ah hna thawh zawh an intiam a; mahse, tuna hna an thawh dan enin, an hun tiamah an dawh zo hman dawn loa a lan avangin an enfiah ta a ni.