MSSSB Chairman thlâk turin MZP-in sorkar ngen an tum

MZP General Headquarters chuan nimin khan thuchhuah siamin, Mizoram Subordinate Services Selection Board (MSSSB)-in Mizoram sorkara thawk tur tun hnaia an lâkah hnam dang an tling fo chu hriatthiam har an tih thu an tarlang. MZP hian January 2023 chhung ngeia MSSSB Chairman thlak turin Mizoram sorkar ngen an tum.

MZP hruaitute chu nimin khan MZP pisa conference hall-ah an ṭhukhawm a; MSSSB leh MZP Special Assembly chungchang te, MZP Assembly 2022 rorel bawhzui dan tur te, hnam dang minister nei lo tura hmalak leh sorkar hna lâkah computer thiamna CCC pawm a nih theih nana hmalak chungchangte an ngaihtuah a ni.

MZP chuan, MZP ngenna ngai pawimawh loa MSSSB-in tun hnaia hna lakah hnam dang an tling fo chu hriatthiam har an tih thu sawiin, "January 2023 chhung ngeia MSSSB Chairman thlak turin sorkar ngen ni se. Mizo zirlai leh hna zawng mekte tana him tur MSSSB dan (Recruitment Rules) siam a nih theih nan hmalak a, MZP ngenna a hlawhtlin loh chuan, MSSSB titawp tura hmalak ni se, tiin a rêl a ni," an ti.

MZP chuan, Mizoram sorkar thar awm turah hnam dang minister an awm loh nan hmalak a, political party tin ngen an rêl a, "MZP ngennain awmzia a neih loh chuan na taka nawr ni se," an ti. Mizoram sorkar hna LDC chin hnuai lamah computer thiamna Course on Computer Concepts (CCC) pawm a nih theih nan hmalak an rél bawk.